Талғар аудандық Мәдениет үйінде Медицина қызметкерлері күніне орай салтанатты шара өтті. Халық денсаулығы күзетіндегі ақ халатты абзал жандарды аудан әкімі Таңат Айдарбеков кәсіби мерекесімен құттықтап, медицина қызметкерлерінің қоғам өміріндегі рөлін атап өтті.
– Медицина қызметкерлері қандай құрметке де лайық. Дәрігердің жанкешті еңбегін ешбір нәрсемен салыстыруға келмейді. Оның құндылығына баға жетпейді. Өйткені, сіздер адам жанының арашашысысыздар. Осы жолда күн-түн демей еңбектеніп, тер төгіп келесіздер. Осы халыққа жасаған қызметтеріңіз абырой биігіне жетелей берсін! Жүректеріңізде әрдайым үміт пен сенімнің, адамдарға деген сүйіспеншіліктің шамы сөнбесін! – деді Таңат Есенкелдіұлы.
Өңір басшысы өз сөзінде сенімгерлік басқару аясында аудандық орталық аурухананы материалдық-техникалық жабдықтау, ауылдық елдімекендердегі дәрігерлік амбулаториялар мен фельдшерлік-акушерлік бекеттерді күрделі жөндеуге елеулі үлес қосқан «А-Class Medical» ЖШС компаниясының қызметі мен оның әлеуметтік маңызына тоқталды. Сондай-ақ өз мамандығына адалдық танытып, тәлімгерлік жасап жүрген сала ардагерлері – Камила Құрбаниязова, Ләззат Шайданова, Нұрзайда Таубалдинованың есімін ерекше атап, бірқатар медицина қызметкерлерін Алғыс хатпен марапаттады.
Салтанатты жиынға қатысқан аудандық мәслихат хатшысы Мұхит Әлібеков, «АMANAT» партиясының Талғар аудандық филиалы төрағасының орынбасары Серік Дүмшібаев жүрекжарды лебіздерін білдіріп, ақ халатты жандарға бағалы сыйлықтар мен грамоталар табыстады.
Аудандық аурухананың бас дәрігері Оңғарсын Байұзақов та өз әріптестерін құттықтап, өңір дәрігерлерінің кәсібилігі мен медициналық мекемелердің материалдық-техникалық жарақтандырылуы арта түскенін алға тартты. Оның айтуынша, бүгінгі таңда аудандық ауруханада 2 мыңнан астам медицина қызметкері еңбек етеді. Олар 213 мың 503 тұрғынға күндіз-түні қызмет көрсетеді, күніне 5 мыңға жуық адам дәрігерлер көмегіне жүгінеді. Сенімгерлік компанияның күшімен Дәулет, Туғанбай, Береке, Бірлік ауылдарындағы дәрігерлік амбулаторияларға күрделі жөндеу жүргізілген. Өткен жылы 40 дана жабдық сатып алынған, оның ішінде заманауи компьютерлік томограф, 128 тілікке арналған жылжымалы рентген, наркозды-тыныс алу аппараты бар. Ендігі кезекте лапароскопиялық аппарат алу, МРТ-жабдықтар үшін корпус салу жоспарланып отыр. Медициналық ұйымдарды кадрлармен қамту көрсеткіші 71 пайызды құрайды, 134 учаскеде 88 жалпы практика дәрігері жұмыс істейді. Болашақта кадрлармен жасақтау жұмысы жалғаса бермек.
Салтанатты құттықтаудан кейін Оңғарсын Алғабекұлы еңбегімен еленген дәрігерлерге ҚР Денсаулық сақтау министрлігінің Құрмет грамоталарын табыс етті. Педиатрия салысында 40 жылдан астам еңбек еткен медицина ардагері Камила Қожалымқызы да әріптестерін кәсіби мерекемен құттықтап, жұмыстарына табыс тіледі.
Салтанатты жиын соңы концерттік бағдарламаға ұласты.
Құтмағамбет ҚОНЫСБАЙ
Талғар ауданы
