Райымбек ауданына қарасты Талас пен Шалкөде ауылының барша тұрғыны Нұрсәуле Әбдірешқызы Бекболованы осылай атайды. Көптің алғысын арқалап, сый-құрметіне бөленуі – мейірбикенің өз мамандығына деген сүйіспеншілігі. Денсаулық сақшысы деген қастерлі есімге кір келтірмей, ардақтай білгендігі. Өз ісіне жауапкершілікпен қарап, емделуге келген әрбір жанға лайықты қызмет көрсетіп келе жатқандығы.
1964 жылы Нарынқол ауылында дүниеге келген Нұрсәуле 8-сыныпты үздіктер қатарында бітірген. Медицина мамандығына деген қызығушылығы оқушы кезінен-ақ жүрегіне берік ұялаған жас түлек арман жетегімен Талғардағы медициналық училищеге құжаттарын тапсырады. Мақсаты биік, талабы таудай қыз сынақтан сүрінбей өтіп, оқу орнына ең жоғары нәтижемен қабылданады. Ізденіс пен еңбекқорлықты жанына жастайынан серік еткен болашақ маман іргетасы мектепте қаланған білімін ары қарай ұштап, медицинаның қыр-сырын жетік меңгеруге ден қояды. Білімі терең, білігі жоғары ұстаздардың әрбір дәрісін санасына сіңіреді. Оқумен қатар жүретін ғылыми-тәжірибелік іс-шараларға да белсене қатысып, алғырлық танытады.
Оқу орнын 1982 жылы бітірген жас маман туған ауылына оралып, алғашқы қызметін Нарынқол аудандық ауруханасының перзентхана бөлімінде балалар мейірбикесі, аға акушер болып бастайды. Оқу орнынан алған білімін тәжірибе жүзінде көрсетуге білек сыбана кіріседі. Осы саланың жілігін шағып, майын ішкен аға-тәтелерінің ақыл-кеңестеріне де жүгінеді. Өз мамандығына деген қызығушылығы, ізденісі мен еңбекқорлығы айналасы екі-үш жылдың ішінде ортасына білікті маман ретінде танытып, алдына шипа іздеп келгендердің сенімдерін нығайтты.
Нұрсәуле Әбдірешқызы 1987 жылы отбасылы болуына орай, ендігі сүрлеу соқпағы ауданнан шалғай жатқан Талас ауылында жалғасты. Осындағы фельдщерлік-акушерлік пунктке мейірбикелік қызметке тағайындалады. Адамның денсулығы басты міндетім деп білетін ол жаңа ортаны жатсынбай, тұрғындармен еркін араласып, ауру-сырқаудан аман болуын басты назарда ұстайды. Сырқат жандарға дәрі-дәрмекпен қатар жүрек жылуын ұсынып, жылы сөзімен қанаттандыра білуді де айнымас серігіне айналдыра біледі. Салған инесі, тағайындаған дәрі-дәрмектері майдай жағып, ауруынан айыққан жандар Нұрсәуленің атын тура атамай, «Біздің сүйікті дәрігер» дейтіні де сондықтан.
Саналы ғұмырының 40 жылға жуығын медицина саласымен тығыз байланыстырған Нұрсәуле Бекболова бүгінде Шалкөде дәрігерлік амбулаториясында жалпы тәжірибелі мейірбике болып қызмет атқаруда. Адам денсаулығы жолындағы ұзақ жылғы ерен еңбегі атаусыз қалған емес. Лайықты бағалануда. Әр жылдары медицина қызметкерлерінің төл мерекесінде аурухана әкімшілігінен, аудан әкімдігі мен облыстық «Сенім» кәсіподақ ұйымынан алған Алғыс хаттар мен мақтау қағаздары соның айқын дәлелі.
– Сырқатына дауа іздеп келген әрбір жан менің қолданған ем-шарам арқылы дертінен айығып жатса, мен үшін одан асқан бақыт жоқ, – дейді Нұрсәуле ағынан жарылып.
Реті келгенде біз де мамандығын мақтанышына балаған ақ желеңді абзал жанды мерейлі қуанышымен құттықтап, әрдайым абырой биігінен көрінуіне тілектестігімізді білдіреміз.
Жұмабек ТӘЛІПҰЛЫ
Райымбек ауданы
