Қараой елдімекенінде шекарашы кинологтардың халықаралық жарысы өтті. Мақсаты – жарылғыш заттарды табуға машықтанған иттердің иісшілдігін сарапқа салу, кинологтардың бір-бірімен тәжірибе алмасуына мүмкіндік жасау.
ҰҚК Шекара қызметі қызметтік кинология басқармасында өткен сайыстың бірінші күні әр елден келген командаларды таныстырудан басталды. Айта кетейік, бұл жарыс «BOMCA» – Орталық Азияда шекараларды басқаруға жәрдемдесу бағдарламасы аясында осымен екінші мәрте ұйымдастырылып отыр. Оның бірінші кезеңі биылғы жылдың сәуір айында Қырғызстанда өткен. Ол кезде Қазақстан, Қырғызстан, Тәжікстан, Түрікменстан және Өзбекстан елдерінің кинолог мамандары есірткі заттарын іздеудің қыры мен сырын көрсетуге тиіс болатын. Ал біздің елімізде ұйымдастырылған сайыста командалар жарылғыш заттарды табумен бірге әділқазылар алқасының назарына өздеріне бекітілген қызметтік иттердің тәртібін паш етеді.
Ашылу салтанатынан кейін командалар жүксалғыш пен ғимараттарға жасырылған жарылғыш заттарды іздеуге кірісті. Ал екінші күні автосынаққа кезек берілді. Бұл жерде қаз-қатар етіп қойылған көліктер шаңға, жанар-жағармайдың иісіне әбден бөккен. Сондықтан иттерге көліктің көзден таса жеріне жасырылған жарылғыш заттарды табу оңай бола қоймайды. Қылмыскерлер де дәл осыған үміт артады, жарылғыш заттарын өткір иістің астына жасырып қалуға тырысады. Кейде кофе немесе аяқ киім кремдерінің арасына салады, иіссуды да аямай себеді.
– Бүгін халықаралық жарыс ережелеріне сәйкес, нағыз жарылғыш заттар пайдаланылды. Тек мөлшері аздау, бұл да командаларға берілген тапсырманы қиындата түсті, – деді ҰҚК Шекара қызметі қызметтік кинология басқармасы бастығының орынбасары – штаб бастығы, подполковник Қуаныш Түменбаев.
«BOMCA» бағдарламасы аясында ұйымдастырылған турнирдің жоғары деңгейде өтуіне біз жауапты болғандықтан, оқу материалдарын дайындаудан бастап, барлығын қамтуға тырыстық.
ҰҚК Шекара қызметі атынан өнер көрсеткен команда мүшелерінің бірі – Ерқабыл Құсайынов пен оның төрт аяқты досы Сурфат тапсырманы мүлтікіз орындап, халықаралық жарыстың чемпионы атанды. Сөйтіп, 1-орын – ҚР ҰҚК ШҚ қызметтік кинология басқармасының, 2-орын – ҚР ҰҚК «А» қызметі, 3-орын – Тәжікстан елінен келген команданың қанжығасына байланды. Әр номинация бойынша жеңімпаз болып танылғандарға арнайы сертификат беріліп, бағалы сыйлықтар табысталды.
Тамара Дәулетбаева,
ҰҚК Шекара қызметінің запастағы подполковнигі
