Мұны ШЖҚ «Жасыл қала Қонаев» МКК директоры Бақытжан Нұртаев хабарлады.
Оның сөзіне сүйенсек, №6 жағажайда 45 қоқыс жәшігі, 10 контейнер және үш әжетхана орнатылған. Тазалыққа 30 жұмысшы мен 2 арнайы техника жауапты. Күніне 3 рет тазалық жұмыстары жүргізіледі. Қауіпсіздікті 10-нан астам құтқарушы қамтамасыз етіп отыр, медицина қызметкерлері кезекшілік етеді, бейнебақылау камералары орнатылған.
«Мұнда күнделікті демалуға 4-5 мың адам келеді. 60-90 тоннадай қоқыс шығарылады. Ал демалыс күндері бұл көрсеткіш 120-150 тоннаға жетеді. №6 жағажайда 40 кәсіпкерлік нысан жұмыс істейді. Барлығымен келісімшарт жасалған. Оған сәйкес, кәсіпкерлер жалға алған аумақты күтіп ұстау бойынша нақты міндеттемелерді алған. Олар күн сайын тазалық жұмыстарын жүргізуге, тапшандарды дезинфекциялауға, қоқыс жәшіктері мен жарық орнатуға, сондай-ақ қауіпсіздікті қамтамасыз етуге міндетті», – деді мекеме басшысы.
Бұдан бөлек, №5 жағажайда да тазалық жұмыстары жүріп жатыр. Күнделікті 10 тонна, демалыс күндері 25-30 тонна тұрмыстық қатты қалдықтар шығарылуда.
Аталған жағалауда 28 бөлмелі 6 әжетхана, 5 жуыну орны, 6 киім ауыстыратын бөлме, 30 қоқыс жәшігі, 40 бөшке және 25 контейнер бар. Мұнда жасанды интеллектпен жабдықталған бейнебақылау жүйесі орнатылған.
Тұрғындар мен қонақтардан «Таза Қазақстан» акциясын қолдауға шақырамыз. Қоқысты тек арнайы орындарға тастаңыздар! Қала іші мен жағажайдағы тазалықты сақтау – баршамыздың ортақ міндет. Жайлы әрі қауіпсіз демалысты бірлесе ұйымдастырайық!
Айта кетейік, күні кеше шомылу маусымы басталғалы 200-ге жуық әкімшілік құқықбұзушылық орын алғанын жазғанбыз.
