Қарасай ауданының Ақсеңгір және Көктоған ауылдарында отбасылық денсаулық сақтау орталықтары ашылды. Бұл нысандар мемлекеттік-жекеменшік әріптестік аясында «NOVA INVEST» ЖШС-нің қаражатына салынды.
Орталықтың салтанатты ашылу рәсіміне облыстық денсаулық сақтау басқармасының басшысы Ержан Сүлейменов, ҚР Парламенті Мәжілісінің депутаты Анас Баққожаев. «NOVA INVEST» ЖШС бас директоры Қарлығаш Ибраева және аудан әкімі Жасұлан Естенов қатысты.
Әр орталықтың жалпы ауданы 100 шаршы метрден асады. Онда тіркеу бөлімі, жалпы тәжірибе дәрігерлері мен бейінді мамандар қабылдайтын жеті бөлме бар. Бұл орталықтар шамамен 3 мың тұрғынға қызмет көрсетеді деп жоспарланған. Медициналық көмек – ТМККК және МӘМС аясында тегін көрсетіледі. Көктоған ауылындағы ғимарат 2021 жылы, Ақсеңгір ауылындағы – 2023 жылы салынған. Жобаларға сәйкес инвестиция көлемі тиісінше 51 және 49 миллион теңгені құрады. Биыл күзде Кемертоған және Көкөзек ауылдарында тағы екі жаңа нысан пайдалануға беріледі деп күтілуде.
Қуат Қайранбаев
Қарасай ауданы
