Өз ісін жақсы білетін маманның еңбегі қашанда ел аузында жүретіні анық. Өйткені, ондай жанның жүріп өткен жолы жерлестерінің көз алдында. Міне, осындай еңбек адамының қоғамдағы рөлін арттыру мақсатында Мемлекет басшысы Қасым-Жомарт Тоқаев биылғы жылды «Жұмысшы мамандықтары жылы» деп жариялады.
Өзінің еңбек жолын жұмысшы мамандығынан бастап, сол мекемедегі бөлімдерді жете меңгеріп, ұзақ жыл бойы еңбек етіп жүрген жандарды нағыз өз ісінің хас шебері деуге болады. Осындай білікті маманның бірі – Балқаш аудандық пошта торабында қырық жылға жуық еңбек етіп жүрген Ләззат Сейілханқызы.
Бүгінгі әңгіме кейіпкері 1986 жылы Алматы қаласындағы байланыс училищесінде оқып, 1987 жылы Балқаш аудандық пошта торабында сұрыптау бөлімінде өзінің алғашқы еңбек жолын бастаған. Ал 1987 -2009 жылдар аралығында аталмыш мекемеде оператор болса, 2009 жылы орталық операциялау учаскесінің меңгерушісі болып тағайындалып, бүгінде де сол қызметті абыроймен атқарып келеді.
Еңбек десе ерінбейтін Ләззат Сейілханқызы өткен жылы «Қазақстан пошта байланыс қызметкерлерінің салалық кәсіптік одағы» қоғамдық бірлестігінің медалімен марапатталған. Білікті маманның әрбір атқарған жұмысына дән риза болған әріптестері оны айрықша құрмет тұтады. Әсіресе жас мамандар тәжірибелі жаннан тағылым алуға асығады. Мамандық сырын терең меңгерген жанның өнегелі жолы баршаға үлгі.
Бақтығали ДӘУІТБАЕВ
Балқаш ауданы
