Бүгінгі өткен баспасөз мәслихаты Қазақстан Президенті жанындағы Мемлекеттік басқару академиясының оқу бағдарламасына енгізілген өзгерістер тақырыбына арналды. Спикер ретінде Алматы облыстық филиалының басшысы Айгерім Абилова шақырылды.
Оның айтуынша, бұл Академия – жаңа идеялар мен заман талаптарына сай мемлекеттік қызметшілерді дайындайтын интеллектуалды платформа.
«Осы жылы Үкіметтен мемлекеттік қызметшілерді даярлау мақсатында магистратураға 120 грант, докторантураға 12 грант бөлінді. Сондай-ақ сұранысқа сәйкес, «Халықаралық қатынастар» білім бағдарламасы 2 жылға ұзартылды. Магистратураға мемлекеттік тапсырыспен оқуға түсу үшін мемлекеттік қызметте кемінде 2 жыл еңбек өтілі керек болса, докторантураға 5 жылдан кем болмауы қажет», – деді Айгерім Абилова.
Филиал директорының сөзінше, қазіргі таңда оқуға өтінім бергендердің саны 215, ал жоспар бойынша 1000-ға жуық өтінім қабылданбақ.
«Үміткерлерден құжаттарды қабылдау 3 сәуірден басталып, 29 маусымға дейін жалғасады. Құжаттарды Академияның admission.apa.kz ақпараттық платформасында онлайн жолдауға болады», – деді спикер.
Alatau News
