1 шілдеден бастап Алматы облысының автобазасы алғашқы маршруттарын іске қосты. 25 автобус облыс тұрғындарына қызмет көрсете бастады.
«Мемлекет басшысы 2022 жылғы 19 қазанда Алматы облысына жұмыс сапары барысында жолаушылар көлігімен қамтылмаған елді мекендерге автобус маршруттарын беретін коммуналдық кәсіпорын құруды тапсырған еді. Осыған орай 2023 жылдың 31 қаңтарында «Алматы облысының автобазасы» ЖШС мемлекеттік кәсіпорны құрылды.
Осы уақытқа дейін логистика және басқа да ресурстар бойынша жұмыстар жүргізіліп келгендіктен, бұл парк өз жұмысын уақытында бастай алмады. Тек 1 шілдеде парк алғашқы маршруттарды іске қосты. Сонымен қатар біз Алматы қаласымен бірлесе отырып, агломерацияның 50 шақырымдық аймағында жаңа бағыттарды әзірлеп жатырмыз. Қазір облыс бойынша 9 бағытта қызмет көрсететін қосымша 130 жаңа автобус сатып алу жұмыстары жүргізілуде», – деді облыс әкімінің орынбасары Алмас Батанов.
Автопарк 20-ға жуық ауылды елді мекенге, бір қалаға – «Gate City» және Іле ауданының екі ірі шағынауданына қызмет көрсетеді.
Сондай-ақ жақын арада автобустарда QR-код немесе банк картасы арқылы төлем жасалатын электронды билет жүйесі енгізілетін болады.
