Қай кезеңде де еңбек адамының қоғамдағы орны ерекше екені даусыз. Халықтың әл-ауқаты мен тұрмыстық деңгейі ең алдымен кәсіби шеберлік пен жауапкершілікке байланысты. Заманауи өндіріс пен технологияны игеру, жаңа белестерді бағындыру өз ісін жетік меңгерген мамандардың ғана қолынан келеді.
Техникалық және кәсіптік колледждерде оқып жүрген жастардың білім сапасын арттыруда ұстаздардың, өндірістік оқыту шеберлерінің еңбегі айрықша. Осы орайда облыстық білім басқармасының ұйымдастыруымен Шелек политехникалық колледжі базасында «Дәнекерлеу технологиясы» және «Жеңіл автомобильдерді жөндеу» құзыреттілігі бойынша арнайы пән оқытушылары мен өндірістік оқыту шеберлерінің аймақтық конкурсы өтті.
Байқауға облыс көлеміндегі 12 колледжден 24 қатысушы өзара бақ сынасты. Шараға облыстық білім басқармасының мамандары, Мансап орталығының өкілдері қатысты.
«Кәсіби шеберлік – еңбек сапасының кепілі» тақырыбында өткен жиынды Шелек политехникалық колледжінің директоры Қуат Дүйсебаев ашып, конкурстың мақсаты мен міндетіне тоқталды. Ол педагогтердің кәсіби құзыреттілігін арттыру, тәжірибе алмасу және еңбек сапасын жетілдіруге бағытталған шаралардың маңызын атап өтті. Облыстық білім басқармасының бас маманы Ерболат Жұмагелдіұлы өз сөзінде еңбек адамдарының кәсіби шеберлігін дамытуға мемлекет тарапынан үлкен қолдау көрсетіліп жатқанын айтып, қатысушыларға сәттілік тіледі. Байқау барысында олар заманауи өндіріс талаптарына сай білім мен тәжірибесін жан-жақты көрсетті.
Конкурс қорытындысы бойынша «Дәнекерлеу ісі» бағытында бірінші орынды Жамбыл атындағы көпсалалы колледждің өкілі Ержан Дәуренбеков иеленді. Екінші және үшінші орындарды тиісінше Шелек политехникалық колледжінен Жақып Бабахан мен Қаракемер кәсіптік колледжінің оқытушысы Саят Телеуов еншіледі.Ал «Автокөлікке техникалық қызмет көрсету» бағыты бойынша Қонаев көпсалалы колледжінің қатысушысы Айдын Ысқақов жеңімпаз атанды. Екінші орын Талғар агробизнес және менеджмент колледжінің оқытушысы Әділет Әдебиетұлына, үшінші орын Қаракемер кәсіптік колледжінің өкілі Мұхтар Куанышбаевқа бұйырды.
Осындай кәсіби шеберлік байқаулары ұстаздардың тәжірибе алмасуына, білім мен біліктілікті ұштастыруына және еңбек нарығына сай мамандар даярлауға зор мүмкіндік береді. Бұл – еңбек адамына деген құрметтің, кәсібилік пен сапаға ұмтылыстың нақты көрінісі.
Анарбек БЕРДІБАЕВ
Еңбекшіқазақ ауданы
