Қазақстан экономикасы биылғы бірінші жартыжылдықтың қорытындысы бойынша 5 пайызға өсті. Бұл туралы Ұлттық экономика министрі Әлібек Қуантыров үкімет отырысында мәлімдеді.
«Биылғы бірінші жартыжылдықтың қорытындысы бойынша, Қазақстан экономикасының өсу қарқыны 5 пайызды құрады. Оның ішінде нақты сектор 4,8 пайызға, қызмет көрсеу саласы 4,9 пайызға өсті. Негізгі салалардың барлығында оң динамика байқалды. Әсіресе құрылыс, сауда, ақпарат және байланыс саласында өсу қарқыны жоғары», – деді миинстр.
Ведомство басшысының дерегінше, негізгі капиталға салынған инвестициялардың өсу қарқыны 13%, инвестициялар ағыны көлік және қоймалауда – 57%, саудада – 32%, ауыл шаруашылығында – 22%, білім беруде – 21,5% сондай-ақ өнеркәсіпте – 10,9%, оның ішінде тау-кен өнеркәсібінде – 11,4% өсті. Өңірлер арасында ең жоғарғы өсім Абай, Маңғыстау, Батыс Қазақстан облыстарында және Шымкент қаласында байқалды.
«Алдын ала қорытынды бойынша, 2023 жылғы қаңтар-мамыр аралығында сыртқы саудада тауар айналымы 8 пайызға өсіп, 55,8 млрд долларды құрады. Экспорт 31,6 млрд долларды құрады. Бұл ретте өңделген тауар экспорты 3,8 пайызға ұлғайып, 10,2 млрд долларға жетті. Тауар импорты 24,2 млрд долларға жетті. Жалпы, оң сауда балансы 7,4 млрд долларға тең», – деді Әлібек Қуантыров.
