Жамбыл ауданының әкімдігінде 1986 жылғы Желтоқсан көтерілісіне қатысқан азаматтар жиналып, атқарушы биліктің алдына өз ұсыныстарын айтты. Кездесуге «Желтоқсан тарихы» қоғамдық бірлестігінің құрылтайшысы Айсұлу Кеңесова мен республикалық «Желтоқсан ақиқаты» ұйымының Жамбыл ауданы бойынша жетекшісі Құсайын Абжанұлы келді. Оларды аудан әкімінің орынбасары Әділбек Қамбарұлы, аудандық ішкі саясат бөлімінің басшысы Айтгүл Медеуова және аудан әкімі аппаратының басшысы Әмірхан Досымбетов қабылдады.
Желтоқсаншылар аталған қоғамдық бірлестіктердің алдына қойған мақсаты мен міндетінен хабардар етті. Сонымен бірге сол кездегі өрімдей қыз-жігіттер бүгінде біраз жасқа келіп, көпшілігінің денсаулығы сыр бергенін, оларға мемлекет тарапынан қолдау керек екенін жеткізді.
Жиын барысында желтоқсаншылар бірқатар нақты ұсынысты ортаға салды. Атап айтқанда, олар ауданның адам көп жүретін көрікті жерлерінің бірінен «Желтоқсаншылар аллеясы» салынса, бұл жас ұрпақты отаншылдыққа тәрбиелеуге сеп болатынын жеткізді. Желтоқсаншыларды қолдау мақсатында оларға коммуналдық қызметтерді төлеуде жеңілдіктер қарастырылса, сондай-ақ жыл сайын ең болмаса 2-3 адамға санаториялық-курорттық емделуге тегін жолдама берілсе деген ұсынысын да айтты.
Аталған ұсыныстар талқыланып, тиісті мекемелерге жолданатын болды. Кездесуде Жамбыл ауданында барлығы 36 желтоқсаншы тіркеліп, олардың 25-і ақталғаны айтылды.
Серік ӘШІМБЕКҰЛЫ
Жамбыл ауданы
