Еліміз егемендігін жариялап, тәуелсіздіктің тұғырын қалай бастаған тұста 130-дан астам этнос өкілдері өмір сүретін Қазақстанда ұлтаралық қақтығыстар орын алады деп сәуегейлік жасағандар болғаны рас. Алайда біздегі татулық пен бірліктің шайқалуын күтіп, қоғамда этносаралық кикілжіңдер тудыруды аңсағандардың бұл болжамы жүзеге аспай, еліміздің біртұтастығы салтанат құрған еді. Бұл маңызды әрі тағдыршешті іске Қазақстан халқы Ассамблеясы өз үлесін қосқанын жоққа шығаруға болмайды.
Қарасай ауданында аталмыш ұйымның жанынан құрылған ақсақалдар мен аналар кеңестерінің есеп беру жиыны өтіп, жаңа төрағалары тағайындалды. Алқалы басқосуға Қарасай ауданының әкімі Жасұлан Естенов, облыстық ақсақалдар мен аналар кеңестерінің жетекшілері, зиялы қауым өкілдері мен Ассамблея жастары қатысты.
Жасұлан Тоққожаұлы алдымен өңірде атқарылып жатқан ілкімді істерге аға ұрпақ өкілдерінің қосып жатқан үлесі зор екенін атап өтті. Жиында облыстан арнайы келген қонақтар да сөз алып, қоғамдағы ақсақалдар кеңесінің еліміздегі этнос өкілдерінің бірлігін нығайту, мемлекеттік тілді меңгеру және жастарды отаншылдық рухта тәрбиелеу жайындағы ойларын ортаға салды. Қазақстан халқы Ассамблеясы облыстық ақсақалдар кеңесінің төрағасы Амангелді Беспаев аймақта облыстық, қалалық, аудандық және 130 ауылдық округте ақсақалдар кеңесі жұмыс істейтінін тілге тиек етті. Биыл 85 іс-шара ұйымдастырылып, олардың арасында ұлттық дәстүрді дәріптеу, ұрпақ сабақтастығын нығайту, тарихи тұлғаларды таныстыру сияқты көптеген шара, тағылымды кештер өткен. Оған төрт мыңнан астам адам қатысқаны да үлкен нәтиже болса керек. Амангелді Дәнібекұлы алдағы уақытта да мұндай бастамалар жалғасын табатынын жеткізді.
Жиын барысында аналар кеңесінің де жұмыстары кеңінен сөз болды. Ол жайында Қазақстан халқы Ассамблеясы жанындағы облыстық аналар кеңесінің төрағасы Гүлнар Жошыбаева баяндады.
– Алматы облыстық ҚХА жанында 146 аналар кеңесі бар болса, оның ішінде біреуі – облыстық, екеуі – қалалық, 9-ы – аудандық, ал 135-і – ауылдық құрылымдар, – деді Гүлнар Сағатқызы сөзінің басында. Сол сияқты аналар кеңесінің өлкемізде ұлтаралық келісімді нығайту, тұрмыстық зорлық-зомбылықтың алдын алу мақсатында атқарған жұмыстары жайлы толымды ақпарат ұсынды.
Облыс көлемінде аналар кеңесінің ықпалымен жүзеге асып жатқан игілікті істер ауыз толтырып айтарлықтай. Қоғамдағы тұрақтылық пен бала тәрбиесіндегі бастамалар бір сәт те толастамақ емес. Оны облыстық аналар кеңесінің төрағасы нық сеніммен айтып, барлық аналар қауымына ақ тілегін білдірді.
Егемен еліміздің іргетасын қалауға атсалысқан қадірменді қариялар бас қосқан жиында Қарасай аудандық аналар кеңесінің төрағасы Ақылия Бекбайқызының төрағалық міндетінің аяқталуына байланысты аудан әкімі Жасұлан Естенов оның ерен еңбегін, қоғам игілігі жолындағы белсенді қадамдарын, жемісті қызметін ерекше атап өтті. Соңынан қадірменді ананың иығына камзол жауып, облыс әкімі Марат Сұлтанғазиевтің Алғыс хатын табыс етті. Ал облыстық аналар кеңесінің төрағасы Гүлнар Жошыбаева өз сөзінде Ақылия Бекбайқызының қоғамдық қызметі аяқталғанымен, ол кісіге деген құрмет ешқашан толастамайтынын, әрдайым «Құрметті төраға» деген мәртебесімен қала беретінін мақтанышпен жеткізді.
Қарасайлықтардың ерекше құрметіне ие болған Ақылия Бекбайқызы аналар кеңесіндегі төрағалық қызметті ардагер-ұстаз Азиза Наймабаеваға табыс етті. Сондай-ақ бұл жиында аудандық ақсақалдар кеңесінің төрағалық міндеті те талқыға салынды. Қариялар алдындағы бұл жауапкершілігі мол қызметті алдағы уақытта Сағындық Жылқыбаев атқаратын болды.
Жиын соңында облыстық ішкі саясат басқармасына қарасты Қоғамдық келісім және даму орталығының басшысы Елбосын Абайдың атынан Қазақстан халқы Ассемблеясының 30 жылдығына орай бірқатар қарасайлық қарияға Алғыс хаттар тапсырылды.
Қуат ҚАЙРАНБАЕВ
Қарасай ауданы
