Өңірлік коммуникациялар қызметінің ақпараттық алаңында өткен брифингте облыстың бас мемлекеттік санитариялық дәрігері Марат Исмайылов балаларға қызмет көрсететін ұйымдарды бақылау туралы заңға енгізілген өзгерістер жайлы баяндады.
Спикердің айтуынша, Мемлекет басшысы биыл 4 желтоқсанда «Қазақстан Республикасының кейбір заңнамалық актілеріне мәдениет, білім, отбасы және мемлекеттік бақылау мәселелері бойынша өзгерістер мен толықтырулар енгізу туралы» Заңға қол қойған. Балаларға қызмет көрсететін ұйымдарды бақылаудың жаңа тәртібін реттейтін бұл түзетулер 2026 жылдың 1 ақпаннан бастап күшіне енеді.
– Мемлекеттік бюджеттен қаржыландырылатын мектеп, балабақша, сауықтыру лагері, медициналық ұйымдар санитариялық-эпидемиологиялық бақылау органдарының ерекше бақылауында болады. Бұл тексерулер 4 түрлі негізде жүргізіледі: жоспарлы тексеру, жоспардан тыс тексеру, тергеп-тексеру, нысанаға бару арқылы мониторинг жүргізу. Тексеру алдын ала хабарланбайды. Ерекше бақылау кезінде санитариялық ережелер мен нормалардың бұзылуы анықталған жағдайда, қоғамдық қауіпті салдардың туындауын болдырмау мақсатында жедел шаралар қолданылып, айыппұл салмай, анықталған заңбұзушылықтарды жою туралы нұсқама берілуі мүмкін. Нұсқаманың орындалмағаны анықталған жағдайда, мұндай субъект әкімшілік жауапкершілікке тартылады. Санитариялық-эпидемиологиялық сараптама жүргізу үшін өнім мен шикізат компоненттерінің сынамаларын іріктеу, қызметкерлердің жұмысын тексеру зертханалық сараптама арқылы жүзеге асырылады. Белгіленген заңдағы өзгерістер мен толықтырулар балалардың денсаулығы мен өміріне зиян келтіретін қауіп-қатерлердің алдын алып, қолайлы өмір сүру ортасын қалыптастырады. Осылайша мемлекеттік бақылаудың жаңа тәртібі балалардың денсаулығын қорғаудың неғұрлым айқын, ашық және жедел жүйесін қамтамасыз етеді. Бұл балалардың оқитын, тұратын жері, тамақтануы, медициналық көмек көрсету сапасы үнемі кәсіби бақылауда екеніне ата-аналар сенімін арттырады, ал нысандар үшін санитариялық талаптар мен балаларға қызмет көрсетудің жоғары деңгейін сақтау керегін міндеттейді, – деді спикер.
Тоғжан ЖОЛДЫҒАЛИ
