Мемлекет басшысы Қ.Тоқаевтың Қызылорда қаласында өткен Құрылтайдағы сөзінен кейін елімізде Ата Заңымызға енгізілетін өзгерістер жайы кеңінен талқыға түсіп кетті. Әсіресе Конституциялық комиссия өз жұмысын белсенді жүргізіп отыр. Аталмыш комиссияның кезекті отырысында Конституциялық сот төрағасының орынбасары Бақыт Нұрмұханов Конституциялық реформа комиссиясының мүшелеріне Ата Заңға енгізілетін өзгерістердің жиынтық жобасын таныстырды.
Ата Заң – еліміздің басты бағдары, халқымыздың тәуелсіз, зайырлы, бейбіт қоғамда өмір сүруі үшін қажетті басты құнды құжатымыз. Әрине, еліміздің бір орында тұрақтап қалмасы үшін, дамыған елдермен иық тірестіре бірге дамуы үшін Ата Заңымызға да тиісінше өзгерістер керек-ақ.
Конституциялық комиссияның бүгінгі отырысынан Ата Заңымыздағы түзетулер мәтіннің 84 пайызын қамтитынынан хабардар болдық. Демек, Конституция түбегейлі өзгереді деген сөз. Бір қуанарлығы, бұл құжат ел азаматтарынан, саяси партиялардан, қоғамдық ұйымдардан және сарапшылардан түскен ұсыныстар негізінде әзірленген. Бұл мемлекетіміздің ашық қоғамға, демократиялы мемлекетке, әділетті Қазақстанға айнала бастағанының басты дәлелі деп білеміз.
77 бапқа енгізілген түзетулер арасында мемлекет пен діннің өзара ықпалдастығы, неке мен отабсы құндылығын реттейтін нормалар, сөз бостандығы мен шығармашылық еркіндігі құқығына жаңаша мән-мағына берілгенін аңғардық. Иә, мұның бәрі де – ел дамуы үшін қажетті қағидаттар. Әсіресе неке мен отбасы ұғымы қазақ қоғамында басты құндылық саналған. Ал қазіргі заманда бұл құндылық өз құнын жойғандай. Отбасы мемлекеттің басты күші. Демек, отбасы мығым болса мемлекет те мығым. Сондықтан Ата Заңымызда неке және отбасының ерекше аталуы орынды.
Тағы бір қуанарлығы Бақыт Нұрмұхановтың айтуынша, Ата Заңымызда тілдік нормалар мен мемлекетік тіл мен орыс тіліндегі мағына қайшылықтарының орын алмауы үшін арнайы білікті мамандар тобы жұмыс атқарып жатыр екен. Ендеше жаңаша мазмұндағы Ата Заңымыз еліміздің елдігін, халқымыздың бірлігін айқындайтын құнды құжат болады деп сенеміз.
Нұрсұлтан Болатұлы,
«Amanat» партиясы Ұйғыр аудандық филиалы төрағасы
