Облыс әкімі Марат Сұлтанғазиев «КИПРОС» жеке инвестициялық холдингінің өкілдерін қабылдады. Басқосуда «Akbulak Mountain Resort» тау курортын дамыту бойынша ауқымды инвестициялық жобасы талқыланып, қолданыстағы туристік аймақты кешенді жаңғырту және оның базасында халықаралық деңгейдегі заманауи жылдың барлық мезгілінде жұмыс істейтін курортты қалыптастыру жайы сөз болды.
Компания басшысы Айнұр Шәненова мен өзге де қызметкер аймақ басшысының назарына аталған жобаның тұжырымдамасын ұсынды. Тұжырымдамаға сәйкес жоба шамамен 3200 гектар аумақты қамтиды. Курорт Алматыдан шамамен 36 шақырым, халықаралық әуежайдан 28 шақырым жерде және болашақ Alatau city қаласының жанында орналаспақ. Қыста тау шаңғысы инфрақұрылымын жаңғырту, трассаларды кеңейту және шаңғы-биатлон кешенін дамыту жоспарлануда. Болашақта Shymbulak Ski Resort, Oi-Qaragai Mountain Resort және Medeu сияқты нысандармен бірыңғай тау кластерін қалыптастыру қарастырылады. Курорттарды аспалы жолдар желісімен байланыстыруға болады. Бұл туристерге аймақтың таулы туризмінің негізгі нүктелері арасында жүруге мүмкіндік береді.
Жобаның негізгі мақсаты – Ақбұлақ кешенін туристік-индустриялық аймақ ету. Онда бір стандартта экологиялық түрде ішінде тау шаңғы курорты, қонақ үй , гольф алаңы, 4 мезгіл бойы туристерді қабылдайтын кешен жасау қарастырылған. Жазғы инфрақұрылым да аумақты дамытудың маңызды бөлігіне айналады. Спорттық және рекреациялық мүмкіндіктерді кеңейту, соның ішінде гольф алаңын пайдалану, спорт академияларын, ойын спорт түрлеріне арналған алаңдарды және ашық ауада демалуға арналған маршруттарды дамыту жоспарлануда.
Жоба аясында халықаралық спорт ұйымдарымен ынтымақтастық қарастырылуда. Мұның өңірге әлемдік деңгейдегі жаттықтырушылар мен спортшыларды тартуға септігін тигізетіні анық. Заманауи туристік инфрақұрылымды құруға көп көңіл бөлінеді. Курорт аумағында қонақ үй кешендерін, SPA-орталықтарды, мейрамханалар мен конгресс-алаңдарды салу көзделіп отыр. Сонымен қатар мәдени-ойын-сауық кеңістіктерінің, сауда аймақтары, іс-шаралар мен концерттер өткізуге арналған алаңдардың пайда болуы жоспарланған. Тұрақты құрылыстың халықаралық стандарттарын қолдану, автомобильсіз аймақтарды дамыту және инфрақұрылымды басқару және қауіпсіздікті қамтамасыз ету үшін цифрлық технологияларды пайдалану қарастырылуда. Тұжырымдамада тұрғын үй кварталдары, виллалар, халықаралық мектептер, бизнес-кеңістіктер және медициналық және сауықтыру туризмінің нысандары бар. Инвесторлардың пікірінше, мұндай тәсіл адамдар бір жерде тұрып жұмыс істей және демала алатын «live-work-play» форматындағы толыққанды экожүйені қалыптастыруға мүмкіндік туғызады.
– Қазіргі уақытта Талғар ауданында тау шаңғы курортын салу жөнінде облыс әкімдігі инвесторлармен туристік инфрақұрылымды дамыту мәселелері бойынша келіссөздер жүргізуде. Мастер-жоспар әзірленуде. Дайын болған кезде жобаны жұртшылық назарына ұсыну жоспарлануда, – деді облыстық туризм басқармасының басшысы Қуанышбек Мейрамбекұлы.
Алдын ала есептеулер бойынша жоба іске асқан уақытта 6 мыңға жуық жұмыс орнын құруға болады. Жоба аймақ экономикасына айтарлықтай үлес қосады және қызмет көрсету, ауыл шаруашылығы және қолөнер өндірісін дамытуға ықпал етеді деп күтілуде.
Айжарық КӨПТІЛЕУОВ
