8 наурыз – Халықаралық әйелдер күні – мейірім мен сұлулықтың, нәзіктік пен парасаттылықтың мерекесі. Бұл күн – аналар мен аруларға, қыз-келіншектерге деген құрмет пен алғысымызды білдіретін ерекше мейрам.
Осы айтулы мерекеге орай, Қазақстан Республикасының Ұлттық ұланы 6654 әскери бөлімінің командирі, полковник Алқайдаров Сағындық Ахмадиұлы әскери қызметтегі және еліміздің дамуына үлес қосып жүрген барлық әйелдерді шын жүректен құттықтайды.
Бүгінде әйелдер қоғамның барлық саласында белсенді еңбек етіп, ел дамуына сүбелі үлес қосып келеді. Әсіресе, әскери салада қызмет атқарып жүрген аруларымыздың орны ерекше. Олар ер-азаматтармен қатар Отан алдындағы борышын адал атқарып, әскери тәртіп пен жауапкершіліктің үлгісін көрсетіп келеді. Әскери қызметтегі нәзік жандылар батылдық пен төзімділіктің, кәсібилік пен табандылықтың жарқын үлгісін танытып, әскери ұжымның абыройын асқақтатуда.
6654 әскери бөлімінде де әйел әскери қызметшілер мен азаматтық қызметкерлер маңызды міндеттерді атқарып келеді. Олар әскери бөлімнің күнделікті тыныс-тіршілігіне белсене араласып, тәртіп пен ұйымшылдықтың сақталуына, жас сарбаздарды тәрбиелеуге өз үлестерін қосуда.
Қадірлі аналар, ардақты арулар! Сіздерді 8 наурыз – Халықаралық әйелдер күнімен шын жүректен құттықтаймын! Сіздерге зор денсаулық, отбасыларыңызға амандық, еңбектеріңізге табыс тілеймін. Әрдайым жүздеріңізден күлкі кетпей, жүректеріңіз қуанышқа толы болсын!
Сағындық Ахмадиұлы Алқайдаров,
6654 әскери бөлім командирі,
полковник
