Ұлыстың ұлы күні – Наурыз мейрамы қарсаңында Наурызнама акциясы аясында 6654 әскери бөлімінің басшылығы, офицерлері, әскери қызметшілері мен жеке құрамы Қонаев қаласындағы балалар үйіне арнайы барып, қайырымдылық шарасын ұйымдастырды. Бұл игі бастаманың басты мақсаты – мерекелік күндері балаларға қуаныш сыйлап, оларға қамқорлық пен мейірім көрсету, сондай-ақ қоғамда ізгілік пен бірліктің үлгісін қалыптастыру.
Қазақ халқы үшін Наурыз – жаңару мен жақсылықтың, татулық пен берекенің символы. Осындай мәні терең мереке қарсаңында әскери қызметшілер де қоғамға пайдалы істер атқаруды дәстүрге айналдырып келеді. Осыған орай 6654 әскери бөлімінің ұжымы балалар үйіне арнайы дайындалып, балаларға қажетті киім-кешек, тұрмыстық заттар және түрлі сыйлықтар апарып табыстады. Бұл сыйлықтар балаларға тек материалдық көмек қана емес, сонымен қатар жүректен шыққан қамқорлық пен жылы ықыластың белгісі болды.
Шара барысында 6654 әскери бөлімінің оркестр ұжымының ұйымдастыруымен мерекелік концерттік бағдарлама ұсынылды. Әскери бөлімнің сарбаздары мен өнерлі қызметшілері сахнаға шығып, патриоттық әндер мен халық әндерін орындап, өз өнерлерін көрсетті. Ән мен күйге толы концерттік бағдарлама балаларға ерекше әсер сыйлап, мерекелік көңіл-күй сыйлады.
Концерт барысында сарбаздар балаларды Ұлыстың ұлы күні – Наурыз мейрамымен шын жүректен құттықтап, оларға зор денсаулық, жарқын болашақ, білім мен бақыт тіледі. Балалар да өз кезегінде әскери қызметшілерге ризашылықтарын білдіріп, мерекелік шараға белсенді қатысты.
Наурызнама акциясы аясында өткен бұл қайырымдылық шарасы балаларға ерекше қуаныш сыйлап қана қоймай, қоғамдағы мейірімділік пен жанашырлықтың жарқын көрінісіне айналды. Осындай игі бастамалар адамдар арасындағы өзара құрмет пен сыйластықты нығайтып, жас ұрпаққа қамқорлық көрсетудің маңызын айқындай түседі.
6654 әскери бөлімінің басшылығы мен жеке құрамы алдағы уақытта да осындай әлеуметтік маңызы бар шараларды жалғастырып, қоғам игілігіне бағытталған жұмыстарды жүзеге асыра беруді жоспарлап отыр.
Қырғызбай Альбина Қайратқызы
6654 әскери бөлімінің бөлініс бастығы, кіші сержант
