Қатар келген қос мереке – Ораза айт пен Наурыз мейрамы қарсаңында Талғар қаласындағы Мәдениет үйінде көп жылдан бері кезекте тұрған жандарға пәтер кілті табысталды.
Салтанатты шарада аудан әкімі Таңат Айдарбеков жиналған жұртшылықты әз-Наурыз мерекесімен құттықтап, соңғы екі жарым жыл ішінде халықтың осал тобындағы жандарды баспанамен қамту үшін республикалық бюджеттен 359 пәтерге қаржы бөлінгенін атап өтті. Бүгін 22 отбасы баспаналы болатынын, бұл бағдарлама әрі қарай да жалғаса беретінін айтты.
Бұдан соң аудан әкімі Таңат Есенкелдіұлы қуаныш тиелеріне баспана кілтін және әкімдік атынан дайындалған сыйлықтарды табыстады. Алғашқы болып Александр Букиев пәтер кілтін қолына алса, одан соң Сәуле Боқаева, Мөлдір Сайбекова, Руслан Путшиев, Александр Кириллов, Арайлым Сәрсенбаева, Ғалия Кенжебекова, Бақытгүл Алджажарова, тағы басқалар рет-ретімен шақырылып, баспана кілтіне ие болды. Әсіресе осы сәтті ұзақ күткен параолимпиада қатысушысы Иван Глазырин мен мүгедек ана Зульфия Жантасованың қуанышында шек жоқ.
Айта кетер болсақ, «Отбасы Банк» АҚ мен Талғар ауданы әкімдігінің арасында мемлекет тарапынан берілген 153 жалдамалы пәтерді бөлу жөнінде келісім жасалған. Бүгін соның 22-сі әлеуметтік осал топтағы жандарға табысталды. 2025 жылы ауданның құрылыс бөлімі 205 пәтер сатып алған еді, биыл олар да кезегі жеткен тұрғындарға берілетін болады. Жалпы 2026 жылы Талғар ауданында 358 пәтер өз иесін табады.
– Бүгін шын мәнінде сіздер үшін ең бақытты күн. Өйткені баспана адам үшін ең басты мәселе. Мемлекет басшысының саясатына орай, ауданымызда жыл сайын жүздеген отбасының тұрғын үй жағдайы жақсарып келеді. Барлығыңызды баспаналы болударыңызбен шын жүректен құттықтаймын! Шаңырақтарыңызға әрқашан шаттық пен бақыт орнасын! Әрқайсыңызға зор денсаулық, отбасыларыңа толағай табыс тілеймін! Еліміз гүлденіп, өркендей берсін, – деді Таңат Есенкелдіұлы.
Құтмағамбет ҚОНЫСБАЙ
Талғар ауданы
