Ұлттық спорт күні аясында облыстық спортты дамыту дирекциясы стадионында ауқымды шара өтті. Мақсаты – ұлттық құндылықтарды жаңғырту, жастар арасында салауатты өмір салтын насихаттау, сондай-ақ республикалық деңгейдегі жарыстарға үздіктерді іріктеу.
Спорттық шараның ашылу салтанатында облыс әкімінің орынбасары Ғани Майлыбаев құттықтау сөз сөйлеп, ұлттық мерекенің мән-маңызына тоқталды. «Наурыз – жаңару мен жаңғырудың, ырыс пен берекенің бастауы. Бұл күн табиғат түлеп, тіршілік атаулы жанданып, жаңа өмірге қадам басады. Мереке аясында өңірімізде түрлі мәдени және спорттық шаралар ұйымдастырылуда. Барша қауым бір алаңда бас қосып, өзара құрмет пен ынтымақтың жарық үлгісін көрсетуде. Ұлттық спорт – тарих, тәрбие, намыс, бірлік. Осындай жарыстар арқылы біз жастарды отансүйгіштікке баулып, төл өнерімізді ұрпақ санасына сіңіреміз», – деді Ғани Айдарұлы.
Облыстық спортты дамыту дирекциясының алаңы ұлттық нақышта безендіріліп, мерекелік әуен әуеледі. Музыкалық саздың сүйемелдеуімен жарысқа қатысушы командалар бірінен соң бірі сап түзеп, көрермен алдында шерулетіп жүріп өтті. Облыстың қалалары мен аудандарынан жиналған 300-ден астам спортшы асық ату, бес асық, тоғызқұмалақ, гір тасын көтеру, арқан тарту, қол күресі сынды дәстүрлі жарыстарда өзара бақ сынады. Жүлдегерлер ақшалай және бағалы сыйлықтармен марапатталды.
Ерзат АСЫЛ
