Жамбыл ауданында жастар ресурстық орталығының жанынан құрылған «Мейірім» еріктілер клубы түрлі бағыттағы қоғамдық маңызы бар іс-шараларға белсене қатысады. Клуб мүшелері жауапкершілік пен азаматтық таныту арқылы елдегі еріктілер қозғалысын дамытуға өз үлестерін қосып келеді.
Жуырда жастар ресурстық орталығының ұйымдастыруымен Халықаралық еріктілер жылына орай «Ардагерлерді ардақтайық!» жобасы аясында кезекті шара өткізілді. Аудан жастары жалғызбасты қарттардың ауласын тазартып, үй-жағдайына көмек көрсетті. Атап айтқанда, Жамбыл атындағы кәсіптік-техникалық колледжінің білімгерлерінен құралған еріктілер Ұзынағаш ауылының тұрғыны Бердіқұл атаның ауласын тазалап беріп, алғысын алды. Сол сияқты аталған акция аясында ауыл жастары Кәмилә апаның да шаңырағына барып, тұрмыстық шаруаларына қолқабыс етті.
– Бұл шараның басты мақсаты – үйде жалғыз тұратын қарттарға жәрдемдесу арқылы қоғамда мейірімділік пен еріктілік мәдениетін дамыту. Игі іспен айналысу, адамдарға жақсылық жасау – халқымыздың көне заманнан келе жатқан дәстүрі. Біз осы дәстүрді сақтап қалуымыз керек. Өйткені біреуге қолұшын созып, қолдау көрсету – қанымызға сіңген қасиет. Халқымызда осындай береке-бірлікке шақыратын «Асар» дәстүрі бар. Бұл – ғасырлар бойы құндылығын жоймаған ата салтымыз. «Жұмыла көтерген жүк жеңіл» демекші, волонтерлік қызметтің басты мақсаты да сол – біріге жұмылып, халыққа қызмет ету, – дейді аудандық жастар ресурстық орталығының басшысы Балжан Досалы.
«Мейірім» клубы экологиялық, әлеуметтік, қайырымдылық және төтенше жағдайлардың алдын алу мен салдарын жою бағытында тұрақты жұмыс жүргізіп келеді. Студенттер мен ауыл жастары арасында волонтерлік мәдениетті кеңейту мақсатында көптеген іс-шара ұйымдастырылды.
Серік САТЫБАЛДИЕВ
Жамбыл ауданы
