Алматы облысында орналасқан 6654 әскери бөлімінде «Ас – адамның арқауы» ұранымен тамақтануды ұйымдастыру айлығы аясында маңызды дөңгелек үстел өтті. Іс-шараның негізгі мақсаты – әскери қызметшілердің сапалы әрі теңгерімді тамақтануын қамтамасыз ету, олардың денсаулығын сақтау және асхана қызметінің жұмысын жетілдіру.
Аталған жиынға бөлім басшылығы, тыл қызметінің мамандары, медицина қызметкерлері, сондай-ақ асхана қызметкерлері қатысты. Сонымен қатар, Қонаев гарнизонының әскери прокуроры, әділет полковнигі Байманов Абзал Аманжолұлы арнайы қатысып, әскери бөлімдегі тамақтану сапасы мен заң талаптарының сақталуына қатысты өз пікірін білдірді.
Дөңгелек үстел барысында әскери бөлімдегі тамақтануды ұйымдастыру жүйесінің қазіргі жағдайы кеңінен талқыланды. Қатысушылар азық-түлік өнімдерінің сапасы, тағам дайындау технологиясының сақталуы, санитарлық-гигиеналық талаптардың орындалуы және ас мәзірінің құнарлылығы мәселелеріне ерекше назар аударды.
Жиын барысында әскери қызметшілердің күнделікті физикалық және қызметтік жүктемесіне сәйкес дәрумендерге бай, құнарлы тағаммен қамтамасыз етудің маңызы атап өтілді. Сонымен қатар, асханалардағы тазалық пен тәртіпті сақтау, азық-түлікті дұрыс сақтау және сапасын тұрақты бақылау қажеттігі айтылды.
Іс-шара барысында қатысушылар өз ұсыныстарын ортаға салып, тамақтану жүйесін одан әрі жетілдіруге бағытталған нақты міндеттерді белгіледі. Мұндай бастамалар әскери қызметшілердің денсаулығын нығайтып қана қоймай, олардың жауынгерлік қабілеті мен қызметке деген жауапкершілігін арттыруға оң әсер етеді.
Айта кету керек, «Ас – адамның арқауы» айлығы аясында алдағы уақытта да бірқатар тағылымды іс-шаралар ұйымдастырылып, әскери бөлімдегі тұрмыс сапасын жақсартуға бағытталған жұмыстар жалғасын табады.
