Алатау қаласында орналасқан 6654 әскери бөлімінде сарбаздардың рухани-мәдени дамуына, тұрмыс жағдайының жақсаруына ерекше көңіл бөлінуде. Әсіресе, ұлттық құндылықтарды дәріптеу бағытында атқарылып жатқан жұмыстардың маңызы зор.
Бөлімде жүйелі түрде қазақтың дәстүрлі тағамдары – бешбармақ, бауырсақ, шелпек дайындалып, сарбаздарға ұсынылады. Бұл игі бастама жас жауынгерлердің бойына ұлттық рухты сіңіріп, елге, жерге деген сүйіспеншілігін арттыруға ықпал етуде. Дастархан басындағы осындай сәттер сарбаздар үшін тек тамақтану ғана емес, бірлік пен бауырмалдықты нығайтатын тәрбиелік мәні зор шараға айналған.
Сонымен қатар, әскери бөлімде әрбір сарбаздың туған күні назардан тыс қалмайды. Күн сайын туған күні бар жауынгерлерге арнайы мерекелік дастархан жайылып, олардың қуанышты сәттері ұжыммен бірге атап өтіледі. Бұл дәстүр сарбаздардың көңіл-күйін көтеріп қана қоймай, олардың әскери ортаға тез бейімделуіне, өздерін үлкен отбасының мүшесі ретінде сезінуіне мүмкіндік береді.
Алатау қаласындағы 6654 әскери бөлімінде жүзеге асырылып жатқан мұндай игі шаралар әскери қызметтің тек қатаң тәртіппен ғана емес, адамгершілік пен қамқорлыққа негізделгенін көрсетеді. Ұлттық дәстүр мен заманауи тәрбие ұштасқан ортада тәрбиеленген сарбаз – ел қорғаны болуға әрқашан дайын.
Қырғызбай Альбина Қайратқызы
Бөлініс бастығы (кітапхана бастығы) кіші сержант Қырғызбай Альбина Қайратқызы
