«Ауыл» партиясының бастамасымен өткен «Батамен ел көгерер» атты республикалық батагөйлер байқауында Алматы облысының атынан қатысқан Берік Байылов жеңімпаз атанды.
Берік Шәріпұлы – Қонаев қалалық кешкі мектептің директоры. «Жалғыз жарық», «Тасқа тұнған тамшылар», «Өмірімнің өрнегі» атты жыр жинақтарының авторы. Халықаралық Д.Қонаев қорының «Мерей» ордені мен «Ыбырай Алтынсарин» төсбелгісінің иегері. 2001 жылы «Жыл мұғалімі» байқауының жүлдегері атанған. Сүйінбай Аронұлының 190 жылдығына орай өткізілген аймақтық ақындар айтысында және Д.Қонаевтың 100 жылдық мерейтойына арналған мүшәйрада 1-орынды еншілеген.
Байқаудың марапаттау рәсімі Астанадағы ҚР Ұлттық музейінің мәжіліс залында өтті. Салтанатты шараға мемлекет және қоғам қайраткерлері, зиялы қауым өкілдері, мәдениет саласының мамандары мен батагөйлер қатысты. Сонымен бірге жыршы-термешілер «Аталар сөзі – асыл мұрамыз» атты концерттік бағдарламасын ұсынып, көрермендерге рухани әсер сыйлады. Бұдан бөлек, еліміздің әр түкпірінен келген батагөйлерге елорданың рухани-мәдени орталықтарына бір күндік саяхат ұйымдастырылды.
– Бұл жетістігімді жеке басымның ғана емес, бүкіл облыстың жеңісі деп білемін. Осындай тәрбиелік маңызы зор іс-шара ұйымдастырған «Ауыл» партиясына айтар алғысым шексіз, – деп ағынан жарылды Берік Байылов.
Айжарық КӨПТІЛЕУОВ