Ел аумағының тұтастығы мен қауіпсіздігі ең алдымен берік әрі сенімді қорғалған мемлекеттік шекараға байланысты. Осы тұрғыда Қазақстан Республикасының Шекара қызметі ұлттық қауіпсіздіктің маңызды тірегі болып саналады.
Қазақстан бес мемлекетпен құрлық арқылы шектеседі және әрбір бағыттағы шекара Қазақстан Республикасы Ұлттық қауіпсіздік комитетінің Шекара қызметі тарапынан мұқият қорғалады. Бұл қызметтің қарамағында ел шебін күзететін, алғашқы қорғаныс желісі саналатын шекара бөлімшелері бар. Солардың бірі – «Алма-Арасан» шекара бөлімшесі. Аталған бөлімше Қарасай шекара басқармасының құрамына кіреді және Алматы қаласының маңында, теңіз деңгейінен шамамен үш мың метрге жуық биіктікте орналасқан. Оның басты ерекшелігі – асқар таулардың арасында, табиғаты көркем, бірақ стратегиялық тұрғыдан аса маңызды аймақта қызмет атқаруы. Бұл өңір тек шекаралық маңызымен ғана емес, табиғи сұлулығымен де әйгілі. Бөлімше маңында Үлкен Алматы шыңы, Үлкен Алматы көлі, Турист шыңы және Аюсай шатқалы сияқты көрікті жерлер бар. Бір қарағанда туристер үшін тартымды мекен болғанымен, бұл аймақ – Қазақстан мен Қырғызстан арасындағы қатаң бақылаудағы шекаралық белдеу. Табиғаты қатал бұл өңірде ауа райы да құбылмалы. Қыста қар қалың түсіп, айналаны ақ ұлпа басса, көктемде қар еріп, тау бөктерлері жасыл түске еніп, ерекше көркем көрініске бөленеді. Жабайы жануарлар тіршілігі жанданып, туристер легі де көбейе түседі. Осындай кезеңде шекарашылардың жұмысы одан әрі жанданады, олар арнайы бекеттерде келушілердің құжаттарын тексеріп, тәртіптің сақталуын қамтамасыз етеді. «Алма-Арасан» шекара бөлімшесінің әскери қызметкерлері тәулік бойы қырағылық танытып, күрделі табиғи жағдайларға қарамастан өз міндеттерін мінсіз атқаруда. Олар арнайы кезекшілікке шығып, белгіленген бағыттар бойынша шекара сызығын күзетеді. Бұл – үлкен жауапкершілік пен жоғары дайындықты талап ететін қызмет. Бөлімшенің ішкі тыныс-тіршілігі де ерекше назар аударуға лайық. Мұнда әскери тәртіп қатаң сақталады, тазалық пен ұқыптылық жоғары деңгейде ұйымдастырылған.
Жеке құрамның тұрмыс жағдайы, тамақтануы мен демалысы талапқа сай жолға қойылған. Бұл өз кезегінде сарбаздардың денсаулығы мен қызмет сапасына оң әсер етеді. Сонымен қатар бөлімшеде жауынгерлік дайындыққа айрықша мән беріледі. Әскери қызметкерлер үнемі оқу-жаттығулардан өтіп, төтенше жағдайларда жедел әрекет ету қабілеттерін жетілдіреді. Қару-жарақ пен техниканың дайындығы, шекараны күзету жүйелері тұрақты бақылауда болады. Аталған бөлімше өзінің стратегиялық маңыздылығына байланысты жоғары басшылықтың тұрақты назарында. Мұнда жиі тексерістер жүргізіліп, оның нәтижесінде бөлімшенің қызметі, тәртібі мен қамтамасыз ету деңгейі әрдайым жоғары бағаланады. Бұл – жеке құрамның кәсібилігі мен жауапкершілігінің айқын көрсеткіші. «Алма-Арасан» – Алматы өңіріндегі қала аумағына кіретін бірегей шекара бөлімшесі. Ол ең биік тау жоталарында орналасып, ел шекарасын қорғауда маңызды рөл атқарады. Бұл жерде қызмет ету – әрбір шекарашы үшін үлкен абырой мен мәртебе. Қорытындылай келе айтарымыз, «Алма-Арасан» шекара бөлімшесі – тек әскери нысан ғана емес, ел тәуелсіздігі мен тыныштығын күзетіп тұрған берік қамал. Оның сарбаздары күн сайын көзге көрінбейтін, бірақ аса маңызды қызмет атқарып, Қазақстанның шекарасын сенімді қорғап келеді. «Шекара – сызық қана емес, ол – елдің намысы, ал шекарашы – сол намыстың үнсіз, бірақ сенімді күзетшісі» деген ұғым әділ айтылған.
Райымбек Құдайберген,
ҚР ҰҚК Шекара қызметі
Қарасай ауданы бойынша шекара басқармасы
«Алма-Арасан» шекара бөлімшесі бастығының орынбасары, лейтенант
