Қонаев қаласындағы Alatau Hub алаңында цифрлық дағдыларды дамытуға, стартап-экожүйеге және жасанды интеллект мүмкіндіктеріне арналған оқыту іс-шарасы өтті. Мақсаты – қатысушылардың цифрлық сауаттылығын арттыру және заманауи технологиялық трендтер туралы ақпарат беру. Іс-шараға «AMANAT» партиясының әйелдер қанатының және бизнес пен қоғамдық ұйымдардың өкілдері, IT-қоғамдастық мүшелері, әр ауданнан келген студенттер қатысты.
Семинар барысында Alatau Hub директоры Жазира Жұмахан «Цифрлық сауаттылық – бәсекелік артықшылық» тақырыбында воркшоп өткізді. Директордың баяндамасында цифрлық трансформацияның негізгі аспектілері, стартаптарды дамыту тетіктері айтылды. Сонымен бірге Astana Hub экожүйесінің өңірдегі технологиялық командалар мен кәсіпкерлерге ұсынатын нақты мүмкіндіктері қамтылды.
Келесі кезекте КеTwinMind компаниясының бұрынғы AI-инженері, сарапшы Жұлдыз Жапардың «Жасанды интеллект: мүмкіндіктері, шектеулері және шынайылығы» тақырыбындағы баяндамасы тыңдалды. Баяндамашы AI дамуының негізгі трендтерін, оның практикалық әлеуетін және қолдану шекаралары жөнінде ақпарат берді. AI өнімдерімен жұмыс істеген маманның халықаралық деңгейдегі нақты жобаларды ұсынып, кейстермен бөлісуі көптеген қатысушылар үшін үлкен тәжірибе алаңы болды.
Қатысушылар цифрлық трансформацияның өзекті бағыттарымен танысып, жаңа білім алып, өзара тәжірибе алмасты. Олар тек теориялық ақпарат алып қана қоймай, цифрлық экономикаға кірудің нақты жолдарын көруге мүмкіндік алды. Цифрлық технологияларды кеңінен насихаттауға, өңірдегі IT-қоғамдастықты нығайтуға және технологиялық ойлау мәдениетін қалыптастыруға бағытталған мұндай іс-шаралардың оқытуға, тәжірибе алмасуға және инновациялар мен жасанды интеллект саласында кәсіби дамуға қолайлы орта қалыптастыратыны сөзсіз. Осы орайда жүйелі жұмыс жүргізіп келе жатқан Alatau Hub облыстағы цифрлық болашаққа ұмтылғандар үшін тартымды орталыққа айналуда.
Айжарық КӨПТІЛЕУОВ
