Облыс әкімі Марат Сұлтанғазиев Жамбыл ауданының Ұзынағаш ауылында тұратын Екінші дүниежүзілік соғыс ардагері Федор Ковалевтің шаңырағына арнайы барып, Жеңіс күнімен құттықтады.
Аймақ басшысы ардагерге Қазақстан Президенті Қасым-Жомарт Тоқаевтың арнайы құттықтау хатын табыстап, майдангердің ел алдындағы ерен ерлігі мен бейбіт өмір жолындағы еңбегіне құрмет көрсетті.
Федор Мелянович 1927 жылы Могилев облысында дүниеге келген. 1944 жылы әскер қатарына шақырылып, арнайы дайындықтан өткен соң 1945 жылы Кеңес-Жапон соғысына қатысқан. Майдан даласында батылдығымен танылған ардагер соғыстан кейін туған жерінде еңбек етіп, кейін Жамбыл ауданына қоныс аударған. 1969 жылдан бастап Ұзынағаш ауылында еңбек етіп, ұзақ жыл «Жамбыл РТС» мекемесінде электр дәнекерлеуші қызметін атқарды. Еңбектегі табыстары үшін бірнеше мәрте Құрмет грамотасымен және бағалы сыйлықтармен марапатталған. Майдандағы ерлігі үшін орден-медальдармен марапатталған. Жамбыл ауданының Құрметті азаматы.
Ардагердің үйіне Жамбыл ауданының әкімі Нұрлан Ертас бірге барды. Жүздесу барысында бейбіт өмірдің қадірі, ел бірлігі мен ұрпақтар сабақтастығы жайлы тағылымды әңгіме айтылып, майдангерге ізгі тілек арналды. Жеңіс рухы мен майдангерлердің ерлігі – кейінгі ұрпақ үшін мәңгілік өнеге.
Серік ӘШІМБЕКҰЛЫ
Жамбыл ауданы
