Облыс әкімі Марат Сұлтанғазиев Қытай Халық Республикасының Алматы қаласындағы Бас консулы Су Фанцюмен кездесті. Жүздесу барысында тараптар екі жақты сауда-экономикалық, мәдени-гуманитарлық және туризм саласындағы ынтымақтастықты арттыру жайын талқылады.
Басқосуда облыс әкімі аймақтың әлеуметтік-экономикалық даму жағдайы, болашақтағы мүмкіндіктері мен қолға алынып жатқан іргелі жобалар туралы баяндады. Мемлекет басшысы Қасым-Жомарт Тоқаев пен Қытай Халық Республикасының төрағасы Си Цзиньпиннің стратегиялық достығы арқасында екі ел арасындағы ынтымақтастық жаңа белеске көтерілгенін атап өтті. Соның нәтижесінде соңғы жылдары Алматы облысы Қытайдың бірқатар провинцияларымен экономика, инвестиция, ауыл шаруашылығы, мәдени-гуманитарлық бағыттарда бірлескен жобаларды жүзеге асырып жатқанын айтты.
«Достық қарым-қатынастың арқасында Алматы облысы мен Қытай елі арасындағы тауар айналымы жылдағы дәстүрге сай жоғары деңгейін сақтап келеді. 2025 жылдың қорытындысы бойынша, бұл көрсеткіш 1 миллиард 257 миллион АҚШ долларына жетті. Бүгінгі таңда облыста Қытай капиталының қатысуымен 140-тан астам кәсіпорын жұмыс істейді. Біз сауда-экономикалық байланысты әрі қарай нығайтуға үлкен мән береміз», – деді Марат Елеусізұлы. Сонымен қатар аймақ басшысы Алматы облысы мен Қытай өңірлері арасындағы өзара тиімді сауда-экономикалық және инвестициялық ынтымақтастықты дамытуда зор мүмкіндіктер күтіп тұрғанына сенім білдіріп, ауыл шаруашылығы, өнеркәсіп және туризм саласында әріптестік байланысты нығайтуға дайын екенін жеткізді.
Бас консул бұл оның Алматы облысына жасаған алғашқы сапары екенін айта келіп, өңірдің әлеуетін жоғары бағалайтынын тілге тиек етті.
«Алматы облысы көптеген көрсеткіш бойынша көшілгері келе жатқанын жақсы білеміз. Мұнда инвесторлар үшін қолайлы жағдай жасалған. Сондықтан да екі тараптың мүдделеріне сай келетін бірқатар ұсынысты жеткізсем деймін. Мәселен, ауыл шаруашылығы өнімдері мен азық-түлік өнімдерін қайта өңдеу, балама энергия көздерін дамыту және инфрақұрылымдық жобалар мен туризмді өркендету аясындағы ынтымақтастықты арттыруда қос тараптың мүмкіндігі зор», – деді Су Фанцю.
Өз кезегінде Бас консул облыс әкіміне жылы қабылдағаны үшін ризашылығын айтып, бұл кездесудің ынтымақтастықтың нығая түсуіне жол ашатынын тілге тиек етті. Кездесу соңында тараптар бірлескен жобаларды іске асыруға, сондай-ақ әріптестік байланысты жан-жақты кеңейтуге дайын екендіктерін білдірді.
Ерзат АСЫЛ
