Кеген ауданындағы А.Нүсіпбеков ауылының тұрғындары мен жастары «Таза бейсенбі» экологиялық акциясына белсене қатысып, ауылдың тазалығына өз үлестерін қосты. Ауылдың оңтүстік батыс аймағы, М.Жартыұлы, Н.Мәшкеев, С.Бейсембетұлы, С.Серкебаев көшелері, кіреберіс арка, стела аумағы қоқыстан тазартылды.
-Ауылдың кіре беріс пен шыға беріс, жолдың екі жақ жиегін, туристер көп өтетін тұстарын тазалап жатырмыз,- деген ауыл әкімі Рүстем Әлімов жаз маусымында қонақтар жиі келетін демалыс орындарында тазалықты сақтауға шақырды.
-«Таза Қазақстан» бағдарламасы бойынша ауылымызда тазалық жүріп жатыр. Демалушылар өздеріңізбен бірге қоқыстарды алып кетулеріңізді сұраймыз. Жерімізді таза ұстайық! Қоқыс тастамайық! Көпшілік болып, ат салысайық! – деді ауыл ақсақалы Ә.Күрмекбаев.
-Адам баласының табиғатқа деген жанашырлығы жоғалып бара жатыр. Себебі, А.Нүсіпбеков ауылы үлкен күре жолдың бойында орналасқан. «Көлсай көлдеріне» қарай туристер жүреді. Табиғатымыз сондай керемет, соны аялай білуіміз керек. Жол жүрген жолаушылар жол бойына, ауыл шетіндегі сай-салаға келіп демалып, қоқыстарыңызды тастап кетесіздер. Сол себепті, сіздерге ескерту жариялап отырмыз. Жер-Ананы сыйлап, табиғатымызды қастерлеуді болашақ ұрпаққа үйретейік, -деген ауылдық ардагерлер кеңесінің төрағасы С.Ұзақов демалушылар мен ауыл тұрғындарына өз ұсынысын жеткізді.
Айта кетейік, осындай акциялар ауданның барлық елдімекенінде ұйымдастырылды. Аудан әкімдігі алдағы уақытта әр өңірде абаттандыру, көгалдандыру және таза орта қалыптастыру жұмыстарын жалғастыра бермек.
Дәурен ӘБУТӘЛІПОВ
Кеген ауданы
