Мемлекет басшысы Қасым-Жомарт Тоқаев «Кітап оқу мәдениетін
дамыту және зерделі ұлт қалыптастыру жөніндегі шаралар туралы»
Жарлыққа қол қойды. Оны толық қолдаймын. Бұл Жарлық адами капиталды
дамыту, қоғамның зияткерлік және мәдени әлеуетін нығайту, білім беру,
тәрбиелеу және оқу-ағарту ісінің негізгі элементі ретінде кітап оқу
мәдениетін насихаттау, зерделі ұлт қалыптастыру, сондай-ақ шығармашыл,
жасампаз және бәсекеге қабілетті тұлғаны дамыту үшін жағдай жасау
мақсатында қабылданды.
Меніңше бұл Жарлық – елдің рухани және интеллектуалдық дамуына
бағытталған аса маңызды стратегиялық қадам. Өйткені бұл құжат тұтас
қоғамның ой-санасын жаңғыртуға арналады.
Өзім 40 жылдан аса кітапхана саласында жұмыс істегендіктен,
кітаптың ұлтты тәрбиелеудегі маңызын жақсы білемін. Ұлттың рухани
қазынасы кітапта. Кітап оқитын қоғам әрдайым дамуға, ізденіске және
жасампаздыққа ұмтылады. Технология мен ақпарат ағыны күшейген қазіргі
заманда жастардың кітапқа деген қызығушылығын арттыру, оқу мәдениетін
қалыптастыру өте керек. Осы мақсатта кітапханалардың жұмысын жаңаша
жетілдіріп, жаңа форматтағы кітапханалар ашу – қазіргі уақыттың талабы.
«Зерделі ұлт» тұжырымдамасының әзірленуі мен бірыңғай ұлттық цифрлық
кітапхана платформасының құрылуы – білімге қолжетімділікті арттырып,
кітап оқу мәдениетін жаңа деңгейге көтеруге мүмкіндік береді.
Бибінұр ЫБРАЙЖАНОВА
Қазақстанның құрметті кітапханашысы,
Жамбыл ауданының Құрметті азаматы
