18 мамыр – күллі әлем мәдениет пен руханияттың алтын ордалары саналатын музейлердің мерейін асқақтататын Халықаралық музейлер күнін атап өтеді. Бұл – өткен мен бүгінді жалғап, ұлт жадысын сақтап келе жатқан қасиетті мекемелердің қоғамдағы маңызын айшықтайтын ерекше мереке. Әсіресе мемориалдық музейлердің орны бөлек. Олар ұлт тарихында өшпес із қалдырған тұлғалардың өмір жолын, еңбегін, рухани мұрасын кейінгі ұрпаққа аманаттап, тарихи сананы жаңғыртады. Осындай тағылымы терең рухани ордалардың бірі – академик Қаныш Имантайұлы Сәтбаевқа арналған мемориалдық музей.
Қаныш Сәтбаев музейі – қазақ ғылымының шамшырағы атанған ұлы ғалымның ғибратты ғұмыры мен өлшеусіз еңбегін дәріптейтін киелі мекен. Мұнда академиктің жеке тұтынған заттары, қолжазбалары, сирек фотосуреттері, ғылыми еңбектері мен тарихи құжаттары сақталған. Әрбір жәдігер – ұлт ғылымын өркендетуге бар ғұмырын арнаған тұлғаның қажырлы еңбегінен сыр шертетін үнсіз шежіре іспетті. Музей табалдырығын аттаған әрбір келуші Қаныш Имантайұлының ғылымға деген адалдығын, туған елге деген шексіз сүйіспеншілігін терең сезінеді.
Музей ұжымының басты мақсаты – жас ұрпақтың ғылымға қызығушылығын арттырып, оларды отансүйгіштік рухта тәрбиелеу, ұлттық құндылықтарды насихаттау. Осы бағытта музейде тағылымды экскурсиялар, ғылыми кездесулер, тақырыптық көрмелер мен тәрбиелік шаралар тұрақты түрде ұйымдастырылып келеді. Әсіресе Халықаралық музейлер күні қарсаңында өтетін ашық есік күндері көпшілік қауымның ерекше қызығушылығын тудырады. Келушілер ұлы ғалымның өмір жолымен танысып қана қоймай, қазақ ғылымының қалыптасу тарихы жөнінде де мол мағлұмат алады.
Бүгінде музей ісін заман талабына сай жаңғырту бағытында ауқымды жұмыстар жоспарлануда. Цифрлық технологияларды енгізу, виртуалды экскурсиялар мен интерактивті бағдарламаларды іске қосу арқылы тарихи мұраны кеңінен дәріптеуге мүмкіндік арта түспек. Бұл – жас буынның ұлттық тарих пен ғылымға деген қызығушылығын оятудың заманауи жолы.
Халықаралық музейлер күні – өткенге тағзым етіп, мәдени мұраға құрмет көрсететін тағылымды мереке. Музейге барған әр адам рухани дүниесін байытып, тарихпен тереңірек қауышады. Өткенін ұлықтап, тарихи жадысын қадірлей білген елдің болашағы да жарқын болары сөзсіз.
Назымбетова Г.Ш.
Академик Қ.И.Сәтбаевтың мемориалдық музейінің директоры
