Қылмыстың кез келген түрі адам өмірі мен қоғам тыныштығына қауіп төндіреді. Соның ішінде тұрмыстық зорлық-зомбылық – тек бір отбасының ішкі мәселесі емес, бүкіл қоғамға әсер ететін әлеуметтік мәселе.
Тұрмыстық жанжалдың соңы ауыр құқықбұзушылыққа немесе қылмысқа ұласуы мүмкін. Сондықтан мұндай жағдайларға «отбасылық мәселе» деп немқұрайлы қарау дұрыс емес. Зорлық-зомбылықтың алғашқы белгілерінің өзінде тиісті көмекке жүгіну – қауіптің алдын алудың маңызды жолы.
Қылмыспен күресте жазалау шараларымен қатар профилактикалық жұмыстардың маңызы зор. Құқықтық сауаттылықты арттыру, азаматтарға өз құқықтарын түсіндіру, отбасылармен әлеуметтік және психологиялық жұмыстар жүргізу қылмыстың алдын алуға мүмкіндік береді.
Әсіресе балалардың қауіпсіздігіне ерекше назар аударылуы тиіс. Үйдегі жанжал мен зорлықты көріп өскен бала психологиялық тұрғыдан зардап шегуі мүмкін. Сондықтан баланың айналасындағы ересектер оның мінез-құлқындағы өзгерістерге назар аударып, қажет жағдайда мамандардың көмегіне жүгінгені жөн.
Зорлық-зомбылықты жасыру немесе оған көз жұма қарау мәселені шешпейді. Керісінше, уақыт өте келе оның салдары ауыр болуы мүмкін.
Құқықбұзушылықтың алдын алу – тек полицияның емес, ата-ананың, педагогтің, қоғамның ортақ міндеті. Әр адам өз айналасындағы қауіпке бейжай қарамаған жағдайда ғана зорлық-зомбылықсыз қауіпсіз орта қалыптастыруға болады.
Тоғжан ЖОЛДЫҒАЛИ