Қоғамдық қауіпсіздік – полицияның немесе белгілі бір мемлекеттік органның ғана міндеті емес. Бұл – әр азаматтың күнделікті өміріне тікелей қатысты ортақ жауапкершілік. Ауладағы тәртіптен бастап, көшедегі қауіпсіздікке дейінгі әрбір мәселе тұрғындар мен құқық қорғау органдарының өзара байланысына тәуелді.
Бүгінде қоғамдық тәртіпті қамтамасыз етуде «полиция – қоғам» серіктестігіне басымдық беріліп келеді. Оның басты мақсаты – құқықбұзушылық болғаннан кейін әрекет ету емес, оның алдын алу.
Бұл ретте тұрғындардың белсенділігі ерекше маңызды. Күмәнді жағдайды байқап, дер кезінде хабарлау, аулалар мен қоғамдық орындардағы тәртіп мәселесіне бейжай қарамау, балалардың қауіпсіздігіне назар аудару – қарапайым көрінгенімен, үлкен қауіптің алдын алатын әрекеттер.
Қауіпсіз қоғам тек бақылау арқылы қалыптаспайды. Ол өзара сенім, жауапкершілік және бір-біріне деген құрмет арқылы орнығады.
Сондықтан қоғамдық қауіпсіздік – «біреудің жұмысы» емес, баршаның ортақ ісі. Азамат пен полиция бір-біріне сеніммен қарайтын орта қалыптасқанда ғана қауіпсіздік күнделікті өмірдің ажырамас бөлігіне айналады.
Серік САТЫБАЛДИЕВ