Қонаев қаласының әкімдігі шаһардың жаңа жыл мерекесіне орай қалай безендірілетіні жайлы ақпарат берді.
Тұрғынүй коммуналдық шаруашылық бөлімінің басшысы Дархан Қарағонысовтың ақпаратына сүйенсек, 20 метрлік басты шырша қаланың орталық алаңына орнатылып жатыр. Бұдан бөлек, облыс орталығындағы парктер мен көшелер де безендірілмек. Мысалы, орталық саябақта қар іспеттес лабиринт бой көтереді. Идея авторларының сөзінше, бұл орын балалар мен жасөспірімдердің ойын-сауық алаңына айналмақ.
«Қала тұрғындары мен қонақтарына арнап мерекелік атмосфераны жасау үшін қолдан келгенін аянып қалмаймыз. Қонаевта жарықтандырылған, фотоаймағы бар 44-тен астам дизайнерлік мафтар көшелердің ажарын кіргізетін болады», – деді Дархан Қарағонысов.
Әкімдіктің мәліметінше, жақында қалалық жағажайда мұз айдыны ашылмақ.
