Қаскелең қаласының тағы бір озат оқушысы Олжас Амангелдин өзі сияқты дарынды балалардың қатарында Кипрде өтетін робототехника саласы бойынша халықаралық жарысқа аттанбақ. Бұл жеңіске Олжас көп жылғы табанды еңбегі мен ізденістерінің арқасында жеткені анық.
Ол бір кездері Қаскелең қаласында орналасқан Абай атындағы мектеп-гимназияда білім алған болатын. Соңынан тәжірибесін шыңдай түсу үшін Алматы қаласындағы Назарбаев зияткерлік мектебіне ауысып, осы жерде робот құрастыруға маманданған «Pid» командасының құрамында білімін жалғастырған. Олжас бұл жерде, сонымен қатар, химия-биология бағыты бойынша тереңдетіп оқу бағдарламасын меңгеруде. 12 оқушыдан тұратын команданың үш мүшесі 12-сыныпта оқитын болса, қалғаны 10-сынып оқушылары. Арнайы топтың капитаны – Асылбек Қаныбекұлы.
Дарынды балалар 8-сыныптан бастап түрлі байқауларға қатысып, өз бақтарын сынап жүрген. Шәкірттерінің қызығушылығын аңғарған робототехника пәнінің мұғалімі Айбек Қалабай мен «Әлем» инновациялық орталығында жұмыс істейтін Талғат Сүндетов олардың білім-білігін арттыруға ықпал етеді. Бүгінгі заманның ең озық әрі сұранысқа ие робототехника саласының қыр-сыры мен құпияларын зерделей отырып, жасөспірімдер саланың шеберіне айналады. Осылайша, 2023 жылы дәрежесі өте жоғары екі байқаудың жеңімпазы атанады. Оның бірі Алматы қаласындағы «Атакент» іскерлік байланыс аумағында өткен «Техкап» байқауы болса, екіншісі Астанада ұйымдастырылған еді.
Талапкерлердің бұл жеңістері Қаскелең қаласында орналасқан Сүлеймен Демирел университетінде өткен халықаралық «First Champion chip» байқауына қатысуға мүмкіндік ашты. Осы жарыстың қорытындысы бойынша құрамына қаскелеңдік Олжас Амангелдин кіретін «Pid» командасы Кипрде өтетін халықаралық жарысқа жолдама алды. Бұл жарыста жеңіс тұғырынан көріне алса, қазақстандық өнертапқыштарға АҚШ-тың Хьюстон қаласында жыл сайын өткізіліп тұратын дүбірлі додаға аттануға мүмкіндік ашылады.
– «Pid» командасы өте ұйымшыл, ауызбірліктері жарасқан жастардан жасақталған, – дейді Олжас. Бізге шетелде Қазақстан намысын қорғау мүмкіндігі берілгені үшін өте қуаныштымын. Осылайша, біз қазақстандық жастардың білімі мен өнерін әлемге паш ете аламыз. Иә, сол бірлігіміз бен еңбекқорлығымыздың арқасында команда қазіргі заманның жаңа технологиялар әлемінде өз бағытын таба білді. Сонымен қатар, біздің «Firs+Tech Chanenge» жүйесі бойынша 18 жасқа дейінгі жастарды қамтитын жарысқа қатысатынымызды айта кеткен орынды. Сондықтан, бәсеке өте күрделі әрі тартысты болатынына күмән жоқ. Алайда, біз өзімізге сенеміз! Біз де өз тарапымыздан Олжастың алдағы дүбірлі додада жеңіске жетуіне тілектеспіз.
Қуат Қайранбаев,
Қарасай ауданы
