Мемлекет басшысының тапсырмасына сәйкес басталған «Таза Қазақстан» республикалық экологиялық акциясы Жамбыл ауданында ұйымшылдықпен өтуде. Акция аясындағы «Киелі мекен» апталығында осы аймақта орналасқан 51 ескерткіштің аумағын тазалау, абаттандыру жұмыстары жүргізіліп жатыр.
Сондай тарихи мекеннің бірі – аудан орталығынан шалғайдағы Қарабастау ауылы маңындағы «Таңбалы» тарихи-мәдени және табиғи қорық-мұражайында сенбілік өтті. Аудан орталығынан ат арытып арнайы келгендер аталған қорық-мұражайдың аумағын тазартып, туристер қабылдайтын «Таңбалы сапар орталығының» айналасына 30 түп қарағай ағашының көшеттерін отырғызды. Сонымен қатар жартас суреттері мен археологиялық ескерткіштерді көруге баратын туристік бағыттардың бойындағы ақпараттық тақтайша, орындық, бастырма, жол белгілері сияқты көмекші құралдар сырланып, ағаш түптері әктелді.
Бұл жұмысқа аудандык мәслихат төрағасы Мадияр Әмірғалиев пен «Аманат» партиясы аудандық филиалының жетекшісі Ықылас Амалбек бастаған бір топ депутат пен қоғам белсенділері, жастар ұйымы, еріктілер білек сыбана атсалысты. Мұражай қызметкерлерімен қатар Мәтібұлақ ауылдық округі азаматтарының ұйытқы болуымен өткен экологиялық шараға жалпы саны 100-ден астам адам қатысты. Олардың арасында аталған округке қарасты Мәтібұлақ, Таңбалытас, Шилібастау елдімекендеріндегі білім, денсаулық сақтау, мәдениет мекемелерінің қызметкерлері болды. Сондай-ақ көршілес Беріктас, Самсы, Қопа ауылдарының тұрғындары да келді.
Қазақ елі үшін ғана емес, бүкіләлемдік маңызы бар тарихи мұралар орналасқан Таңбалы шатқалын тазартып, көгалдандыру мақсатындағы мұндай игілікті шара алдағы уақытта да жалғасатын болады.
Серік Сатыбалдиев,
Жамбыл ауданы
