Ата-бабамыз “Ырыс алды – ынтымақ” деген тәмсілді қадап айтты. Оны ұрпақтан-ұрпаққа аманаттап, өзгермейтін мирас етіп қалдырды. Осы қағиданы берік ұстанудың арқасында іргесі мықты елдердің қатарына қосылдық. Мемлекетіміздің саяси-әлеуметтік өмірінен оның жүздеген жарқын мысалын таба аламыз. Құтты жолымызды, қалыптасқан игі дәстүрді жалғастыра беруге тиіспіз.
Мемлекет басшысы Қасым-Жомарт Тоқаев Қазақстан халқы Ассамблеясының ХХХІІІ сессиясында сөйлеген сөзінде “Ассамблея – кейбір адамдар айтып жүргендей, жасанды ұйым емес. Ассамблея ел бірлігін іс жүзінде орнықтыра түсетін тиімді құрылым. Бүгінде бұл – конституциялық мәртебесі бар маңызды қоғамдық орган” деп атап көрсеткені оның татулық пен достыққа сіңіріп жатқан еңбегіне берілген саяси баға.
Ассамблеяның кезекті сессиясы “Бірлік. Жасампаздық. Өрлеу.” деген тақырыппен мәселе көтерді. Бұл көп жайды аңғартады. Осы үш қағиданың арқасында жарқын болашақ қамтамасыз етіледі. Оны жаңа Қазақстанның орнығуына берілген кепілдік десе де болады. Өйткені елдің күші – бірлікте. Мәселен, солтүстік және батыс аймақтардағы тасқынның зардаптарына қарсы тұру, адамдарды құтқару жұмыстарына барлық ұлт өкілдері қатысып, жұдырықтай жұмылды. Бәрі көк тудың аясын топтасты. Кім екенімізді, ынтымақтың қуатына ие ел екенімізді тағы да паш еттік.
Сондықтан Қазақстан халқы Ассамблеясының жұмысын жандандыруға мүдделіміз және міндеттіміз. Одан ұтатынымыз көп болады.
Гүлнар Жошыбаева,
Алматы облысы Қазақстан Халқы Ассамблеясы
жанындағы Аналар кеңесінің төрайымы
