3-5 мамыр аралығында Алматы облысының аумағында орналасқан Таңбалы тас шатқалында дәстүрлі «TENGRI ULTRA» марафоны ұйымдастырылады. Ұлы дала марафоны деген атпен танымал болған шараға қатысушылардың саны биыл айтарлықтай артқан. Бұл туралы Өңірлік коммуникациялар қызметінде өткен баспасөз мәслихатында Алматы облысының туризм басқармасының басшысы Қуанышбек Мирамбекұлы мен «Экстремалды Атлетика» ҚБ басқарушы директоры Вадим Винокуров айтты.
Ұйымдастырушылардың айтуынша, жобаның басты мақсаты – бұқаралық спортты дамыту және салауатты өмір салтын насихаттау. Одан бөлек, ішкі және сыртқы туризмді дамыту.
Іле жағалауындағы үш күндік ашық аспан астындағы фестивальге шамамен 3 мыңнан астам атлет қатысады деп жоспарлануда, ал бүгінге дейін қатысуға 1500 атлет өтініш білдірген. Олар 1, 3, 7, 25, 50 және 100 шақырымдық қашықтыққа жүгірумен қатар, скандинавиялық жүріс және веложарыс пен каникросс бойынша да сайысқа түседі.
«Аталмыш фестиваль биыл 10-мәрте дәстүрлі түрде ұйымдастырылады. Бұл – біз үшін мерейтой. Жыл сайын біздің фестиваль ерекшеленіп, азаматтардың қызығушылығы артып келеді», – деді Вадим Винокуров.
Оның айтуынша, базалық лагерь Таңбалы-Тас жартасты шатқалында орналасқан. Спорт сүйер қауым марафонға қатыса отырып, көркем табиғатқа тамсана алады.
«Марафон еліміздің спорт тарихында ерекше орны бар шара. Халықаралық дәрежедегі сертификаты бар осы жоба көркі көз тартатын, келбеті келісті өңірімізде 2015 жылдан бері өткізіліп келеді. Осы 10 жыл көлемінде марафонға кемінде 50 елдің мыңнан астам адам қатысты. Бұл ішкі туризм дамуына үлкен септігін тигізеді»,-деді Қуанышбек Мирамбекұлы.
Жарысқа тіркелу 26 сәуір күні, сағат 12:00-ге дейін немесе қатысушылар санының шегіне жеткенге дейін ашық. Шара бойынша толықтай ақпартты athletex.kz сайтынан оқуға болады.
