Алматы облысында жантүршігерлік жол апаты болып, бес адам қаза тапты. Облыстық полиция департаменті баспасөз қызметінің хабарлауынша, қайғылы оқиға 9 маусым күні сағат 20:15 шамасында Алматы – Өскемен күре жолының 55-шақырымында болған. Nissan Primera жеңіл көлігінің жүргізушісі рөлге ие бола алмай жолдан шығып кетіп, ағашқа соғылған. Соққыдан жүргізуші мен көліктегі төрт жолаушы оқиға орнында тіл тартпай кеткен. Марқұмдардың бірі кәмелетке толмаған.
Жол апатынан тірі қалған 12 жастағы ұл бала Қонаев қалалық ауруханасына жатқызылған. Оқиға бойынша қазір полиция тиісті сараптама тағайындап, сотқа дейінгі тергеу жұмыстарын бастаған.
Осыдан бір күн бұрын, 8 маусым күні ғана кешкі сағат 9 шамасында Есік қаласына кіреберіс тұста жаяу жүргіншілер жолағында жеңіл көлік 14 және 3 жастағы екі қызды қағып, екеуі де оқиға орнында қаза тапқан.
