Салтанатты шара өз өмірлеріндегі қимас та ұмытылмас, толқынысқа толы сәтті бастан өткеріп, түрлі мамандық иесі атанып жатқан түлектер мен оларға дәріс берген Саида Шалабаева, Ерғали Нұрғалиев, Бағлан Ахмадиев, Ришат Әбішев, Назгүл Хасенова, Айнұр Нұрқалымова сынды өндірістік оқыту шеберлерін таныстырудан басталды.
Алғашқы сөз кезегін алған колледж директоры Нұрсұлтан Баймұханбетов 3 жыл оқып, мамандық иесі атанып, үлкен жолға қадам басқан түлектерді құттықтап, келешекте әр саланың мықты маманы болып, еліміздің мақтанышына айналатындай дәрежеге жетулеріне тілектестігін білдірді.
Колледж директорының өндірістік оқыту жөніндегі орынбасары Әлима Қадырова мемлекеттік емтиханның қортындысы туралы бұйрықпен таныстырғаннан кейін Нұрсұлтан Нұрланұлы жүректері лүпіл қағып, көңілдерін шаттық кернеген түлектерге біліктілік санатын айқындайтын диплом табыстады. Сонымен қатар қоғамдық жұмыстарға белсене қатысқан студенттер Алғыс хатпен марапатталды.
Ата-аналар атынан сөз алған Гүлнира Тұмбаева толқынысқа толы сәтті бастарынан өткеріп, болашаққа қанат қаққалы тұрған түлектердің қадамына құтты болсын айтып, ақжарма тілегін арнады. Одан кейін үздік дипломға ие болып, көңілін шаттық кернеген Максим Устинов сөз алып, білім алып, азамат болып қалыптасуларына жағдай жасап, мамандық сырын меңгеруіне мүмкіндік ашқан ұстаздар қауымы мен ата-аналарға барша түлектер атынан алғыс айтты.
– Біздің колледж 40 жылдан астам уақыт бұрын фарфор зауытына жұмысшылар даярлау мақсатында ашылған. Бүгінде «Тамақтандыруды ұйымдастыру», «Дәнекерлеу ісі», «Автомобиль көлігіне техникалық қызмет көрсету, жөндеу және пайдалану», «Тігін өндірісі және киімді модельдеу», «Есептеу техникасы және ақпараттық желілер» мамандықтары оқытылады. Биыл аталған мамандықтар бойынша 6 топ бітірді. 150-ден астам түлектің алтауы үздік диплом иегері атанды. Олар – Серік Мұратбек, Руслан Алексеенко, Әмина Әлпиева, Жәнел Жомарт, Максим Устинов, Елизавета Пальчикова. Сондай-ақ, түлектеріміз облыстық Ассамблея, жастар ресурстық орталығы, «AMANAT» партиясы және тағы басқа мекемелер мен ұйымдардың мұрындық болуымен өткен түрлі шаралар мен акцияларға белсене қатысты. Нәтижесінде бірқатар студент облыс әкімінің Алғыс хатымен марапатталды, – деп ағынан жарылды колледж директорының тәрбие ісі жөніндегі орынбасары Серік Байшеков.
Айжарық Көптілеуов
