Алматы облысының Жамбыл, Талғар, Қарасай, Іле мен Еңбекшіқазақ аудандарында тұрғындардың үйлеріне табиғи газ құбырын тартудың тұрақты бағасы белгіленді. Бұл туралы бүгін Қонаев қаласында мүдделі тараптар арасында арнайы меморандум қабылданды деп хабарлайды «Алатау арайы» тілшісі.
Меморандумға облыс прокуратурасы, энергетика және тұрғын үй-коммуналдық шаруашылық басқармасы, «Алматы-Газ Серисхолдинг» АҚ, «Тәуекел Газ Құбыры», «Тәуекел-Н-Алғабас», «Жетісу газ құбыры», «Эркай», «Isker Company», «APL Constaction» және «Сигма газ» жауапкершілігі шектеулі серіктестіктерінің өкілдері қол қойды.
Тараптардың келісімі бойынша, 2023 жылдың 31 желтоқсанына дейін абоненттерді газ құбырына қосу бағасы 350 мың теңгеден аспауы тиіс. Бұл сомаға тұрғынүйге тартылатын стандартты 30 метр газ құбыры және жылу қазандығы мен тұрмыстық газ плитасына арналған екі газ көзі кіреді.
Бұған дейін Алматы облысының тұрғындары үйлеріне табиғи газ құбырын тарту қызметінің ақысы қымбат екенін айтып, құзырлы органдарға шағымданған. Осыдан кейін Алматы облысының прокуратурасы, энергетика және тұрғын үй-коммуналдық шаруашылық басқармасы, газ тарату қызметін көрсететін жоғарыда аталған фирмалардың өкілдері газ құбырына қосылу және тұтынатын газ бағасына мониторинг жасау үшін жұмыс тобын құрған.
Құралбек СӘБИТОВ
Қонаев қаласы
