Индустрия және инфрақұрылымдық даму министрлігі “Ашық НҚА” нормативтік-құқықтық актілер порталында Үлкен Алматы айналма автокөлік жолында (ҮАААЖ) жүрудің ақысы көрсетілген бұйрықты жариялады.
Бұйрықтың соңғы нұсқасында Үлкен Алматы айналма автокөлік жолымен жүру бағасы өзгеруі мүмкін екені аталып өткен. Жоба 2023 жылдың 17 сәуіріне дейін талқылауда болады.
Министрлік келесідей бір реттік жол жүру бағасын ұсынып отыр:
жеңіл көліктер – 241,5 теңге;
жолаушылар саны 16-ға дейінгі автобустар мен жүк көтерімділігі 2,5 тоннаға дейінгі жүк көліктері – 414 теңге;
жолаушылар саны 32-ге дейінгі автобустар және жүк көтерімділігі 5,5 тоннаға дейінгі жүк көліктері – 759 теңге;
32 және одан да көп жолаушыға арналған автобустар және жүк көтерімділігі 10 тоннаға дейінгі жүк көліктері – 1242 теңге;
жүк көтерімділігі 10-нан 15 тоннаға дейінгі жүк көліктері – 1483,5 теңге;
жүк көтерiмдiлiгi 15 тонна және одан да көп, оның iшiнде тiркемелерi бар жүк көліктері, ершікті тартқыштар – 2484 теңге.
Үлкен Алматы айналма автокөлік жолымен жиі жол жүретіндер үшін бір айға және бір жылға абонемент қарастырылған.
Жол ақысын концессионер белгілеген ақы алу жүйесін пайдалана отырып, автокөліктің мемлекеттік нөмірі бойынша шотқа төлеуге болады. Сонымен қатар қарызды жеті күнтізбелік күн ішінде өтеуге мүмкіндік беретін кейін төлеу опциясы да енгізілуі болуы мүмкін.
Республикалық маңызы бар Үлкен Алматы айналмалы автокөлік жолының ұзындығы 66 километрді құрайды.
