Астанадағы бейбітшілік және келісім сарайында өтіп жатқан Халықаралық волонтерлар форумында еріктілер ұйымына арнайы грант берілетіні айтылды. Бұл туралы Ақпарат және қоғамдық даму вице-министрі Данияр Қадіров мәлімдеді.
«Былтыр 4 шілдеде Мемлекет басшысы Қасым-Жомарт Тоқаев «Волонтерлік қызмет туралы» Заңға қол қойды. Ол заңда волонтерлік қызметтің жұмысына қолайлы жағдай жасау шаралары қарастырылған. Еріктілердің оқуға түсуіне, жұмысқа орналасуына басымдықтар болады», – деді вице-министр.
Сондай-ақ, ол биыл волентерлік ұйымдарды қолдау үшін 54 жоба қолға алынып, арнайы грант берілетінін атап айтты.
«Волонтерлік ұйымдарға 250 шағын грант беріледі. Әр гранттың сомасы 1 миллион теңгедей болады. Ол гранттардың көбі ауылдағы еріктілер ұйымын қолдауға бағытталып отыр», – деді Данияр Қадіров.
Естеріңізге сала кетсек, күні кеше Түркістанда өткен Ұлттық құрылтайдың екінші отырысында Мемлекет басшысы еріктілердің ерен еңбектеріне ерекше тоқталып, олардың жұмысын қолдау керектігін айтқан еді.
«Мен еріктілер туралы үнемі айтып жүрмін. Себебі еріктілер – ең алдымен, патриот жандар. Олар еліміздің дамуына, оның келбетін жақсартуға зор үлес қосып жатыр. Біз бүкіл қоғам болып еріктілерді қолдауымыз керек, олардың еңбегін бағалап, марапаттап отыру қажет», – деді Президент.
