Мемлекет басшысы Қасым-Жомарт Тоқаев Мемлекеттік қызметші күніне және Полиция күніне орай Twitter парақшасында құттықтау жариялады.
«Мемлекеттік қызметшілерді және тәртіп сақшыларын кәсіби мерекелерімен құттықтаймын! Әділетті Қазақстанды құру үшін әрбір қызметшінің отаншыл, адал болуы және өз ісіне жауапкершілікпен қарауы өте маңызды. Сіздер ел игілігіне қызмет етудің озық үлгісін көрсетесіздер деп сенемін», – деп жазды Қасым-Жомарт Тоқаев.
2003 жылдың наурызында БҰҰ Бас Ассамблеясы 23 маусымды Мемлекеттік қызмет күні деп жариялаған қарар қабылдаған. Елімізде бұл мереке 10 жылдан кейін бекітіліп, 2013 жылы 23 маусым Қазақстанда да Мемлекеттік қызметшілер күні атанды. Ал 2014 жылдан бастап бұл күн кәсіби мереке ретінде тойлана бастады.
Ал 23 маусым – Полиция күні болып 2007 жылы 5 маусымда «Қазақстан Республикасы ішкі істер органдары туралы» ҚР Заңының қабылданғанына 15 жыл толуына орай бекітілген.
