Райымбек ауданының Қарасаз ауылында бүгін ұлттық ат спорты түрлерінен «Жолан жүйрігі» республикалық жарысы басталды. Біріншілік әр жылдары Райымбек және Талғар аудандарының әкімі, Алматы облысында түрлі лауазымды қызметтер атқарған Жолан Омаровты еске алуға арналған.
Қарасаз атшабарында басталған турнир бағдарламасында құнан бәйге (10 шақырым), топ бәйге (20 шақырым) және Аламан бәйге (35 шақырым), сонымен қатар қыз қуу, жамбы ату және теңге ілу сайыстары бар.
Жарыс жеңімпаздары мен жүлдегерлеріне диплом, медаль, кубоктардан бөлек ақшалай сыйақы да қарастырылған. Аламай бәйгеде 1 орынға көлік, 2 орынға 1 500 000 теңге, 3 орынға 500 000 теңге тігілген. Топ бәйгеде 1 орынға көлік, 2 орынға 1 000 000 теңге, 3 орынға 500 000 теңге тігілген. Құнан бәйгенің жүлде қоржынында 1 орынға 1 500 000 теңге, 2 орынға 500 000 теңге, 3 орынға 200 000 теңге қарастырылған. Сайыстарда 1-7 орын алған қатысушыларға ақшалай жүлде табысталады. Турнирдің жалпы жүлде қоры – 2 көлік және 7 миллионға жуық теңгені құрайды.
Дүбірлі дода еліміздегі ұлттар арасындағы достық пен өзара татулық қатынастарды нығайту және ұлттық спортты насихаттау, ұлттық ат спортына қызығушылықты арттыру, жастарды ұлттық құндылықтарды құрметтеуге тәрбиелеу, дәстүрлі ат бәйгесінің деңгейін көтеру мақсатында өткізіліп отыр. Алматы облысының дене шынықтыру және спорт басқармасы, Райымбек ауданының әкімдігі, Алматы облыстық бұқаралық-спорттық іс-шаралар өткізу орталығы, Ұлттық және ат спорты түрлері бойынша спортты дамыту дирекциясы, Алматы облыстық «Бәйге» федерациясы қоғамдық бірлестігі ұйымдастырған жарысқа еліміздің барлық өңірінен және Алматы облысының аудандарынан шабандоздар қатысып жатыр.
Жеңімпаз және жүлдегерлерді марапаттау салтанаты 22 шілде күні кешке өтеді.
