Футболдан 2024 жылғы Еуропа чемпионатына іріктеу сатысында H тобындағы Қазақстан құрамасы сегізінші ойынын Финляндиямен өткізді.
Кездесу барысында құрамалар алғашқы минуттан шабуылға көшті. Екеуіне де жеңіске жету өте маңызды болатын. Қоржынға үш ұпай салған құрама әлі де құрлықтық дода финалдық сатысына берілетін жолдамаға таласатын құрамалар қатарына қосылатын еді.
Ойынның 28-минутында финляндиялық Роберт Тэйлор есеп ашты.
Екінші кезеңде де қос құрама алма-кезек шабуылды үдетті. Ойынның 76-минутында финляндиялық қорғаушылар өзінің айып алаңында қолмен ойнап, төрешілер пенальти белгіледі. Оны қазақстандық Бактиер Зайнутдинов мүлтіксіз орындап, таразы басын теңестірді. Ойынның 90-минутында ол әуелеп келген голды қақпаға кіргізді. Осылайша Қазақстан қарсыласынан 2:1 есебімен басым түсіп, Еуропа чемпионатының финалдық кезеңіне берілетін жолдамаға таласатын мүмкіндігін сақтап қалды.
Айта кетсек, екі құрама бұған дейін ресми ойындарда бес мәрте кездесіп, барлығында финляндиялық футболшылар жеңіске жеткен еді. Сондай-ақ аталған топта Солтүстік Ирландия мен Словения, Сан-Марино мен Дания құрамалары кездеседі.
Енді қазақстандық футболшылар 17 қарашада Астанада Сан-Мариноны қабылдаса, 20 қарашада сырт алаңда Словениямен кездеседі.
Еске салсақ, бұдан бұрын Қазақстан құрамасы жеті кездесу өткізді. Ел құрамасы өз алаңында Словениядан – 1:2, Финляндиядан – 0:1, сырт алаңда Даниядан 1:3 есебімен жеңілсе, Данияны (3:2), Сан-Мариноны (3:0), Солтүстік Ирландия (екі мәрте – 1:0, 1:0) қапы қалдырды.
