Көлік жүргізушілері 1 желтоқсан мен 1 наурыз аралығында қысқы дөңгелекпен жүруге міндетті. Техникалық регламент талабы осындай. Бұл туралы Өңірлік коммуникация қызметінде өткен брифингте Алматы қалалық Полиция департаментінің баспасөз хатшысы Салтанат Әзірбек айтты.
Спикердің сөзінше, тәртіп сақшылары Қазақстан Әкімшілік кодексінің 590-бабының 5-бөлігі бойынша қысқы уақытта жазғы дөңгелекпен жүрген жүргізушіге айыппұл салуға құқылы.
Бұл айыппұлдың ең төменгі мөлшері — 5 айлық есептік көрсеткіш (АЕК), егер бір жыл ішінде жүргізуші осындай заңбұзушылықты қайта жасаса, онда айыппұл 10 АЕК-ке дейін артады.
«Қыс таяп қалды, сондықтан 1 желтоқсаннан 1 наурызға дейін біздің барлық көліктеріміз қысқы резеңкеге ауысуы керек. Бұл — қауіпсіздік талаптары, өйткені ірі мегаполисте алғашқы жауын-шашыннан кейін аласапыран басталады. Себебі — жүргізушілер қыс мезгіліне дайын емес», — дейді Салтанат Әзірбек.
