Еңбекшіқазақ аудандық жолаушылар көлігі және автомобиль жолдары бөлімі, «Алматы облысының жолаушыларды тасымалдау компаниясы» және «Ақжол Агротранс» ЖШС арасында меморандум жасалған. Соның нәтижесінде Есік қаласынан Ташкенсаз, Саймасай, Бәйдібек би ауылдарына автобус қатынасы жанданды.
Енді аталған үш ауылдық округ тұрғындары аудан орталығына такси жалдамай-ақ, қоғамдық көлікпен бара алады. Жайдарман жаңалық ауыл жұртшылығын қуанышқа бөледі.
– Тасымалдаушылар шығынының бір бөлігін бюджет есебінен субсидиялау бойынша арнайы комиссия құрылып, қажетті қаражат көлемі анықталып, облыстық жолаушылар көлігі және автомобиль жолдары басқармасына қаражат бөлу мақсатында бюджеттік өтінім тапсырылған еді. Міне енді, сол мәселе оң шешімін тауып, №1 «Баяндай – Есік», №101 «Амангелді – Есік», №106 «Бәйдібек би – Есік», «Алмалы – Есік» бағыты бойынша жаңа маршруттар іске қосылды. Жолақысы қолма-қол – 150 теңге, «Alempay» картасы арқылы – 80 теңге. Бұл бағыттағы көліктер жұрт игілігі үшін қызмет ететін болады, – дейді аудандық жолаушылар көлігі және автомобиль жолдары бөлімінің басшысы Бейбіт Құлжамбайұлы.
Ерзат Асыл,
Еңбекшіқазақ ауданы
