Елімізде наурыздың соңын ала 12 облыста еріген қар суы тасқынға ұласып, ондаған ауыл, жолдар мен көпірлерді су шайғаны белгілі. Бұл жағдайға байланысты аталған облыстарда жергілікті жерде төтенше жағдай жарияланып, тасқыннан зардап шеккен халыққа республика көлемінде қол ұшын созып көмек көрсету шаралары басталды.
Алматы облысында сегіз ауданда және облыс орталығы Қонаев қаласында тасқыннан зардап шеккен өңірлерге гуманитарлық көмек көрсету орталықтары құрылып, қарапайым тұрғындар, мекемелер мен түрлі ұйымдар қолдан келгенше қаржылай, материалдық көмектерін көрсете бастады. Бұл акцияға бүгін Алматы облысында басылып шығатын “Алатау арайы” газеті де қосылып, табиғи апаттан зардап шегіп отырған өңірлерге ең қажетті азық-түлік, гигиеналық заттар түрінде көмек көрсетті.
Еске салайық, облысымыздың әр ауданында гуманитарлық көмек қабылдау пунктері құрылған. Ол туралы толық ақпаратты мына сілтемеден оқуға болады.
