Кеген аудандық Мәдениет үйінде ветеринария саласы қызметкерлерін марапаттауға арналған салтанатты жиын өтті. Оған аудан әкімі Нұрбақыт Теңізбаев, әкімшілік қызметкерлері, ауыл әкімдері, сала ардагерлері мен мал дәрігерлері қатысты.
Жиналған қауым ең алдымен Мәдениет үйінің фойесіне ветеринариялық заттар қойылған көрмені тамашалады. Шарада сөз алған Нұрбақыт Молдахметұлы:
– Экономиканың негізгі тірегі болып саналатын мал шаруашылығы саласында ветеринарияның алар орны ерекше. Мемлекет басшысы Қасым-Жомарт Тоқаев Қазақстан халқына Жолдауында: «Мал басының амандығы және өнімділігі жергілікті ветеринарлардың тиімді жұмысына байланысты. Бұл түптеп келгенде ауылдағы ағайынның әл-ауқатына тікелей әсер етеді. Ветеринария қызметі қазіргі заман талабына сай болмаса, ауыл шаруашылығы өнімдерінің экспортын арттыру мүмкін емес» – деп, бұл орайда Үкіметке нақты тапсырмалар берген болатын. Бүгінде стратегиялық маңызы бар сала қарқынды дамып келеді. Бұл істе өздеріңіздің де қолтаңбаларыңыз бар. Сіздердің жұмыстарыңыз өте ауқымды. Жануарлардан таралатын қаншама ауруларды емдеумен айналысып, өз өмірлеріңізді тәуекелге тігіп, жұмыс жасайсыздар. Аудандағы 48 мың бас ірі қара, 32 мың бас жылқы мен 187 мың бас қой-ешкінің амандығы, санының артуы және тұқымының асылдануы ветеринария саласына тікелей қатысты. Қазіргі таңда кереге таулы Кеген өңірінде ветеринария саласында 111 қызметкер, оның ішінде 100 ветеринариялық дәрігер абыройлы қызмет атқаруда, – дей келе жеткен жетістіктерге ат салысып, аянбай тер төккен еңбеккерлерге алғысын білдірді. Бұдан соң бірқатар азаматқа ҚР Ауыл шаруашылығы министрлігі Ветеринариялық бақылау және қадағалау комитетінің Құрмет грамотасы, «Алматы облысы ветеринария саласындағы қызметкерлерінің кәсіптік одағы» қоғамдық бірлестігінің «Еңбек ардагері» төсбелгісі, облыстық ветеринария басқармасының Алғыс хаты, Кеген ауданы әкімінің Құрмет грамотасы табысталды. Төсбелгілерді кеудесіне таққандардың қатарында осы салада талмай қызмет етіп келе жатқан Бектұрсын Абдрахманов, Шалабай Дәуталиев сынды азаматтар бар.
Жиын барысында ветеринария саласының ардагері Қаби Сақалов:
– Мал дәрігерлерінің атқаратын ісі көп. Мал өнімдерінің қауіпсіздігін қамтамасыз етуден бастап, жануарларға жұқпалы ауруларға қарсы екпе салу, қан алу сынды жұмыстарды атқарып келесіздер. Осынау еңбектеріңізге табыс тілеймін! Алған марапаттарыңыз құтты болсын! – деп тілегін білдірді. Сондай-ақ аудандық ветеринарлық станса директоры Қабыл Төкенов, шаруақожалық қауымдастығының төрағасы Жұмаш Суатаев, ветеринария саласының ардагерлері Үсен Албанов, Кеңесжан Масеновтер жылы лебіздерін жеткізді.
Салтанатты жиын соңында аудан өнерпаздары Шәмші Мәжит, Бахаргүл Айтбаева, Нұрым Байбала ән мен күйден шашу шашты.
Дәурен Әбутәліпов,
Кеген ауданы
