Қонаев қаласында өткен баспасөз мәжілісінде Талғар ауданының әкімі Таңат Айдарбеков өңірдің әлеуметтік-экономикалық дамуы жайлы сөз қозғады.
– Ауданда өнеркәсіп саласында жұмыс істеп тұрған 25 ірі және орта, 1540 шағын кәсіпорында 13 мыңнан астам адам еңбек етеді. Өңірдің табиғи-климаттық жағдайы мен орналасуы экономиканың туристік секторын дамытуға кеңінен мүмкіндік береді. Алатау ауылдық округінде «Almalyk» демалыс аймағы мен Панфилов ауылдық округінде «Royal 101» көпфункционалды кешені ашылды. Аудан экономикасын дамытудың тағы бір көрсеткіштерінің бірі – шағын және орта бизнес саласы. 22 мың 482 шағын және орта бизнес субъектісі тұрғындардың 30 пайызын жұмыспен қамтып отыр. Бұл саладағы кәсіпорындар санының артуымен қатар өндірілетін өнім көлемі де ұлғайып келеді. Бүгінде көрсеткіш 358,1 млрд теңгені құрап, бюджетке 30,4 млрд теңге қаражат түскен.
Ауданның агроөндірістік кешенінде 1,9 мың ауыл шаруашылығы құрылымы тіркелген. Облыстық құрылыс басқармасы тарапынан 1,3 млрд теңгеге 3 суару арнасы қайта қалпына келтірілді. Айтуар каналына механикалық тазалау жұмысы жүргізілді. 7,1 га алқапты құрайтын 13 жылыжай шаруашылығы 686 тонна өнім жинады. «Ауыл аманаты» бағдарламасы аясында 165 жоба қаржыландырылып, 40 адам жұмыс орнымен қамтамасыз етілді. 110 жоба қаржыландыруды күтуде. 11 ауыл шаруашылығы кооперативі құрылды, – деген аудан басшысы инвестиция тарту, құрылыс, газдандыру, ауызсумен қамту жайына кеңінен тоқталды.
Әрі қарай сөзін сабақтаған Таңат Есенкелдіұлы Талғар қаласындағы Әуезов шағынауданының электр желілеріне күрделі жөндеу жұмысы жүргізіліп, 4 трансформаторлық қосалқы станса орнатылғанын, биыл Кеңдала ауылының электр беру желілерін салуға 200 млн теңге қарастырылғанын тілге тиек етті. Сонымен қатар былтыр аудан жолдарының 26 шақырымына орташа, 37,2 шақырымына ағымдағы жөндеу жұмысы жүргізілгенін, 22 жарықтандырылған жаяу жүргіншілер өткелі, 40 аялдама, 3 бағдаршам іске қосылғанын жеткізді. 11 ауданішілік автобус бағыты бар екенін, «Алем Пэй» электрондық билет жүйесі енгізілгенін, былтыр жолаушы тасымалдайтын «Тұлпар экспресс» ЖШС мердігер мекемесі жаңадан 8 автобус алғанын, тұрғындардың сұрауымен және Алматы қаласының қалалық мобильдік басқармасының қолдауымен Алматы қаласынан Талғар ауданы аумағына жаңадан 7 автобус бағыты ашылғанын хабардар етті.
Баяндамашының айтуынша, 2023-2024 оқу жылының қорытындысында білім сапасы 68 пайызды құраған. Ауданда үшауысымда білім беретін 6 мектеп бар. «Жайлы мектеп» ұлттық жобасы аясында 7 білім ошағының құрылысы жүргізілуде. 20 елдімекен, 13 саяжай, жаңадан бой көтерген 27 ықшамауданнан 7444 оқушы тасымалданып, оқытылуда. Жаңалық ауылындағы №37 орта мектептің бастауыш сыныптарға арналған ғимаратының және Талғар қаласындағы № 9 орта мектептің күрделі жөндеу жұмысы аяқталған. Аудан тұрғындарына 1 орталық, 2 ауылдық аурухана, 13 дәрігерлік амбулатория, 7 фельдшерлік-акушерлік пункт, 7 медициналық пункт және жекеменшік нысанындағы денсаулық сақтау ұйымы, 18 мәдениет ошағы, 243 спорттық нысан халыққа қалтқысыз қызмет етуде.
Таңат Айдарбеков сөз соңында алдағы уақытта ауданға инвестиция тарту, салық базасын ұлғайту, жаңа жұмыс орындарын ашу, аудан тұрғындарының тұрмыс-тіршілігін жақсарту бағытындағы жұмыстар жалғаса беретінін айтты.
Айжарық КӨПТІЛЕУОВ
